യുഎഇയിൽ തോരാതെ പെയ്ത മഴയേത്തുടർന്നുണ്ടായ പ്രളയത്തിൽ ഷാർജയിൽ മൂന്ന് ഫിലിപ്പിനോകൾ മരിച്ചതായി സ്ഥിരീകരിച്ചു. ഫിലിപ്പീൻസിലെ ഒരു ഉന്നത ഉദ്യോഗസ്ഥനാണ് ഇക്കാര്യം വ്യക്തമാക്കിയത്. രണ്ടുപേർ വെള്ളപ്പൊക്കത്തിൽ കുടുങ്ങിയ വാഹനത്തിനുള്ളിൽ ശ്വാസംമുട്ടിയും മറ്റൊരാൾ വാഹനാപകടത്തിലുമാണ് മരണപ്പെട്ടതെന്നാണ് റിപ്പോർട്ട്.
പ്രളയത്തിൽ അകപ്പെട്ട ഫിലിപ്പീൻസുകാർക്ക് സഹായം നൽകുന്നതിനായുള്ള എല്ലാ ശ്രമങ്ങളും നടത്തുന്നതായി ദുബായിലെ ഫിലിപ്പീൻ കോൺസുലേറ്റ് ജനറൽ പ്രസ്‌താവനയിലൂടെ വ്യക്തമാക്കി. കോൺസുലേറ്റും മൈഗ്രന്റ് വർക്കേഴ്സ് ഓഫീസ്-ഓവർസീസ് വർക്കേഴ്സ് വെൽഫെയർ അസോസിയേഷനും ദുബായ് അധികൃതരുമായി ഏകോപനം നടത്തിവരുന്നുണ്ടെന്നും അടിയന്തര പിന്തുണ നൽകാൻ കഴിയുമെന്നാണ് പ്രതീക്ഷയെന്നും അധികൃതർ അറിയിച്ചു.
ജനങ്ങളുടെ സുരക്ഷ ഉറപ്പുവരുത്തുന്നതിനായി ദുബായിലെ ഫിലിപ്പിനോ കമ്മ്യൂണിറ്റി ഓർഗനൈസേഷനുകളുമായി ചേർന്ന് ദുരന്ത നിവാരണത്തിനായി പ്രവർത്തിക്കുന്നുണ്ടെന്നും കോൺസുലേറ്റ് ജനറൽ അറിയിച്ചു.
