സൗദിയിൽ നിന്നുള്ള ആഭ്യന്തര തീർത്ഥാടകർക്ക് നാളെ മുതൽ ഹജ്ജ് പെർമിറ്റുകൾ വിതരണം ചെയ്‌ത്‌ തുടങ്ങും. ഈ വർഷം 1,75,025 തീർത്ഥാടകരാണ് ഇന്ത്യയിൽ നിന്നും ഹജ്ജിനെത്തുക. ഇതിൽ 1,40,20 പേർ കേന്ദ്ര ഹജ്ജ് കമ്മിറ്റി വഴിയും, 35,005 പേർ സ്വകാര്യ ഹജ്ജ് ഗ്രൂപ്പുകൾ വഴിയുമാണ് എത്തുക. അതേസമയം, കേന്ദ്ര ഹജ്ജ് കമ്മിറ്റിക്ക് കീഴിലുള്ള ആദ്യ ഹജ്ജ് സംഘം മെയ് 9ന് മദീനയിലെത്തും.
മെയ് 26 മുതൽ ജൂൺ 9 വരെയാണ് കേരളത്തിൽ നിന്നുള്ള ഹജ്ജ് വിമാനങ്ങൾ സർവ്വീസ് നടത്തുക. ഇതിൽ 17,035 പേർ ഹജ്ജ് കമ്മിറ്റിക്ക് കീഴിലാണ് സൗദിയിലെത്തുക. ഇന്ത്യയിൽ നിന്നുള്ള ആദ്യ ഹജ്ജ് സംഘം മെയ് 9ന് ഹൈദരാബാദിൽ നിന്നും മദീനയിലേക്കാണെത്തുക. മദീനയിലേക്ക് വരുന്ന തീർത്ഥാടകർ ഹജ്ജിന് ശേഷം ജിദ്ദയിൽ നിന്ന് നാട്ടിലേക്ക് മടങ്ങും.
ഹജ്ജ് കമ്മിറ്റിക്ക് കീഴിൽ കേരളത്തിൽ നിന്നെത്തുന്നവർ ജിദ്ദയിൽ വിമാനമിറങ്ങുകയും ഹജ്ജിന് ശേഷം മദീന സന്ദർശിച്ച ശേഷം ജൂലൈ 1 മുതൽ മദീനയിൽ നിന്നും നാട്ടിലേയ്ക്ക് മടങ്ങുകയും ചെയ്യും. കോഴിക്കോട് നിന്ന് എയർ ഇന്ത്യ എക്സ്പ്രസ്, കണ്ണൂരിൽ നിന്നും കൊച്ചിയിൽ നിന്നും സൗദിയ എയർലൈൻസ് എന്നിവയാണ് കേരളത്തിൽ നിന്നും ഹജ്ജ് സർവീസുകൾ നടത്തുന്ന വിമാന കമ്പനികൾ.
