അബുദാബി ഷെയ്ഖ് സായിദ് ഫെസ്റ്റിവലിന് നവംബർ 17-ന് തുടക്കം കുറിക്കും. അബുദാബിയിലെ അൽ വത്ബയിൽ സംഘടിപ്പിക്കപ്പെടുന്ന പരിപാടി മാർച്ച് 9നാണ് സമാപിക്കുക.
യുഎഇയുടെ ദേശീയ ദിനാഘോഷങ്ങളോടനുബന്ധിച്ച് എല്ലാവർഷവും നടത്തിവരുന്ന ഈ മേള ആഗോളതലത്തിൽ തന്നെ പ്രാധാന്യമുള്ള ഒരു സാംസ്‌കാരിക ഉത്സവമാണ്. 114 ദിവസം നീണ്ടുനിൽക്കുന്ന ഫെസ്റ്റിവലിന്റെ ഭാഗമായി നിരവധി കലാപരിപാടികൾ, സാംസ്‌കാരിക പരിപാടികൾ തുടങ്ങിയവ അരങ്ങേറും. ഇതിനുപുറമെ സർക്കാർ ഇതര മേഖലകളുടെ പ്രത്യേക പവലിയനുകളും മേളയിൽ അണിനിരക്കും.
പുതിയ തലമുറയ്ക്ക് പരമ്പരാഗത വ്യവസായങ്ങളുടെയും കരകൗശലവസ്തുക്കളുടെയും പാരമ്പര്യം മനസിലാക്കുന്നതിനും പഠിക്കുന്നതിനുമായി പൈതൃക ഗ്രാമവും ഫെസ്റ്റിവലിൽ ഒരുക്കും. വിവിധ രാജ്യങ്ങളുടെ പങ്കാളിത്തവും ഫെസ്റ്റിവലിൽ ഉറപ്പാക്കിയിട്ടുണ്ട്.
