പുതുമയുളള ഒരു ക്യാമ്പയിനുമായി രംഗത്തെത്തിയിരിക്കുകയാണ് സൗദി. തദ്ദേശ പ‍ഴവര്‍ഗ്ഗങ്ങൾ ക‍ഴിക്കാന്‍ ജനങ്ങളെ പ്രോത്സാഹിപ്പിക്കുന്നതിനായാണ് നീക്കം. കാര്‍ഷിക മേഖലയെ പ്രോത്സാഹിപ്പിക്കുകയും പോഷക സമൃദ്ധ വിഭവങ്ങൾ ഭക്ഷണത്തില്‍ ഉൾപ്പെടുത്തുകയുമാണ് ലക്ഷ്യമെന്ന് ക്യാമ്പയിന് നേതൃത്വം നല്‍കുന്ന പരിസ്ഥിതി- ജല – കൃഷി മന്ത്രാലയം പറയുന്നു.
നല്ല ഫലങ്ങൾ ക‍ഴിക്കാന്‍ ജനങ്ങളെ ആഹ്വാനം ചെയ്താണ് ക്യാമ്പയിന് പുരോഗമിക്കുന്നത്. ഇതാണ് സമയം ( ‘ജാഅ വഖ്തഹാ’ ) എന്നാണ് ക്യാമ്പയിന് പേരിട്ടിരിക്കുന്നത്. ഈന്തപ്പ‍ഴം മാത്രമല്ല, തണ്ണിമത്തനും , മുന്തിരിയും, ഓറഞ്ചും അത്തിപ്പ‍ഴവുമൊക്കെ സൗദിയുടെ തനത് വിഭവങ്ങളുടെ പട്ടികയില്‍ ഇടം പിടിച്ചിരിക്കുന്നു. കര്‍ഷകരേയും കൃഷിയേയും പ്രോത്സാഹിക്കുന്ന നടപടി ഫലം ചെയ്തെന്നാണ് മന്ത്രാലയത്തിന്‍റെ വിലയിരുത്തല്‍. വര്‍ദ്ധിച്ചുവരുന്ന കാര്‍ഷിക സംസ്കാരത്തിനൊപ്പം ഭക്ഷ്യ സ്വയം പര്യാപ്തതയിലേക്ക് നീങ്ങണമെന്ന ലക്ഷ്യത്തില്‍ സര്‍ക്കാര്‍ നടപ്പാക്കുന്ന പദ്ധതികളുടെ വിജയമധുരവും പ്രകടമാണ്.
ആഭ്യന്തര വിളകൾക്ക് പ്രാദേശിക വിപണില്‍ ആവശ്യകഥ വര്‍ദ്ധിപ്പിക്കുന്ന നയങ്ങളും സൗദി നടപ്പാക്കുന്നുണ്ട്. ഈന്തപ്പ‍ഴം ഇതര ഫല വര്‍ഗ്ഗങ്ങളുടെ ഉല്‍പ്പാദനതോത് വര്‍ദ്ധിപ്പിക്കാനായെന്നും ക‍ഴിഞ്ഞ വര്‍ഷം 900 ടണ്‍ ഉല്‍പ്പാദനം സാധ്യമായെന്നുമാണ് കണക്കുകൾ. 25 ലക്ഷം ടണ്‍ ഈന്തപ്പ‍ഴ ഉല്‍പ്പാദനവും സൗദിയുടെ കാര്‍ഷിക കരുത്താണ്.
ആഭ്യന്തര ഉപയോഗത്തിനേക്കാണ് കൂടുതല്‍ ഫല വര്‍ഗങ്ങൾ ഉത്പാദിപ്പിക്കാന്‍ ക‍ഴിയുന്നതോടെ കയറ്റുമതി രംഗത്തും സൗദിയ്ക്ക് പുതിയ അവസരങ്ങൾ തുറക്കുകയാണ്. ആഭ്യന്തര ഉപയോഗത്തിന്‍റെ 107 ശതമാനം അത്തിപ്പ‍ഴവും 99 ശതമാനം തണ്ണിമത്തനും 60 ശതമാനം മുന്തിരിയും 34 ശതമാനം മാതള നാരകവും 15 ശതമാനം ഓറഞ്ചും സൗദിയുടെ ഫലവര്‍ഗ്ഗ പട്ടികയിലുണ്ട്.
ക‍ഴിഞ്ഞ വർഷം ലോകഭക്ഷ്യ ഗുണനിലവാരസൂചിക പ്രകാരം സൗദി അറേബ്യ ഒന്നാം സ്ഥാനത്ത് ആയിരുന്നു. ഭക്ഷ്യ ലഭ്യത നിലനിര്‍ത്തിയ 113 രാജ്യങ്ങളുടെ പട്ടികയില്‍ എട്ടാമത് എത്താനായതും സൗദിയുടെ നേട്ടമാണ്.
