എല്ലാ അന്താരാഷ്ട്ര ലക്ഷ്യസ്ഥാനങ്ങളിലും 30 ശതമാനം വരെ കിഴിവോടെ ‘ഗ്രീന്‍ ഫ്ലൈ ഡേ ഓഫര്‍’ പ്രഖ്യാപിച്ച് സൗദി അറേബ്യയുടെ ദേശീയ വിമാനക്കമ്പനിയായ സൗദി എയര്‍ലൈന്‍സ്. പ്രമോഷണല് ഓഫറുകളിലൂടെ അതിഥികളുമായുള്ള ബന്ധം ശക്തിപ്പെടുത്തുന്നതിനുള്ള എയർലൈൻസിന്റെ സമര്‍പ്പണത്തെയാണ് ഇത് പ്രതിഫലിപ്പിക്കുന്നത്. ഇതുമായി ബന്ധപ്പെട്ട നടപടിക്രമങ്ങള്‍ പൂര്‍ത്തിയാക്കാനും പ്രയോജനം നേടാനും ബുധനാഴ്ച വരെ സമയം അനുവദിച്ചിട്ടുണ്ട്.
ഈ ആനുകൂല്യം ഉപയോഗപ്പെടുത്തി ഡിസംബര്‍ ഒന്നു മുതല്‍ അടുത്ത വർഷം മാര്‍ച്ച് 10 വരെ യാത്രചെയ്യാൻ കഴിയും. ബിസിനസ്, ഇക്കണോമി ക്ലാസ് വിഭാഗങ്ങള്‍ക്കും ഈ ആനുകൂല്യം ബാധകമാണ്. കൂടാതെ റൗണ്ട് ട്രിപ്പുകള്‍ക്കും വണ്‍വേ ഫ്ലൈറ്റുകള്‍ക്കും കിഴിവ് ലഭിക്കും. സൗദി എയര്‍ലൈനിന്‍റെ വെബ്സൈറ്റ്, സെയില്‍സ് ഓഫിസുകള്‍,സ്മാര്ട്ട്ഫോണ് ആപ്ലിക്കേഷനുകള്‍ എന്നിവ വഴി യാത്രക്കാര്‍ക്ക് ടിക്കറ്റ് എളുപ്പത്തില്‍ ബുക്ക് ചെയ്യാനും കഴിയും. മാത്രമല്ല, ക്രിസ്മസ് ഉള്‍പ്പടെയുള്ള അവധി ദിനങ്ങള്‍ വരുന്നതിനാല്‍ പ്രവാസികള്‍ക്ക് ഈ ആനുകൂല്യം ഏറെ പ്രയോജനപ്പെടുമെന്നാണ് കരുതുന്നത്.
