കേരള ഹയർസെക്കൻഡറി പ്ലസ്ടു പരീക്ഷയിൽ ഗൾഫിൽ 88.03 വിജയം. പരീക്ഷയെഴുതിയ 568 പേരിൽ 500 പേരാണ് ഉപരിപഠനത്തിന് യോഗ്യത നേടിയത്. ഇതിൽ 81 വിദ്യാർത്ഥികൾ മുഴുവൻ വിഷയങ്ങളിലും എ പ്ലസ് നേടി.
യുഎഇയിലെ എട്ട് സ്കൂളുകളിൽ നിന്ന് 574 പേരാണ് കേരള ഹയർസെക്കൻഡറി പ്ലസ്ടു പരീക്ഷക്ക് രജിസ്റ്റർ ചെയ്‌തിരുന്നത്‌. 43 പേർ പരീക്ഷയെഴുതിയ ഷാർജ ന്യൂ ഇന്ത്യൻ മോഡൽ സ്‌കൂൾ നൂറുമേനി വിജയം കൊയ്‌തു. മാത്രമല്ല ഒമ്പത് പേർക്ക് മുഴുവൻ വിഷയങ്ങളിലും എ പ്ലസും ഉണ്ട്. 124 പേർ പരീക്ഷയെഴുതിയ അബുദാബി മോഡൽ സ്‌കൂളിലും എല്ലാവരും പാസായി. 38 പേർ എല്ലാ വിഷയത്തിലും എ പ്ലസ് കരസ്ഥമാക്കി. ദുബായ് ന്യൂ ഇന്ത്യൻ മോഡൽ സ്‌കൂളിൽ പരീക്ഷയെഴുതിയ 109 പേരിൽ 108 പേർ വിജയിച്ചു. 26 പേർ മുഴുവൻ എ പ്ലസ് നേടി വിജയിച്ചു.
റാസൽഖൈമ ഇന്ത്യൻ സ്‌കൂളിൽ 62 പേരിൽ 50 പേർ വിജയിച്ചപ്പോൾ 74 പേർ പരീക്ഷയെഴുതിയ ഉമ്മുൽഖുവൈൻ ദി ഇംഗ്ലീഷ് സ്‌കൂളിൽ 59 പേർ പാസായി. രണ്ടുപേർ മുഴുവൻ വിഷയത്തിലും എപ്ലസ് നേടി. ഫുജൈറ ഇന്ത്യൻ സ്‌കൂളിൽ 50 പേരിൽ 45 പേർ വിജയിച്ചപ്പോൾ മൂന്ന് പേർ ഫുൾ എപ്ലസ് കരസ്ഥമാക്കി. 104 പേർ പരീക്ഷക്ക് രജിസ്റ്റർ ചെയ്‌ത ദുബൈ ഗൾഫ് മോഡൽ സ്‌കൂളിൽ 68 പേരാണ് വിജയിച്ചത്. അൽഐൻ ന്യൂ ഇന്ത്യൻ മോഡൽ സ്‌കൂളിൽ പരീക്ഷയെഴുതിയ 23 പേരിൽ 19 പേർ പാസായി മൂന്ന് പേർ മുഴുവൻ വിഷയത്തിലും എ പ്ലസും നേടി.
