രാജ്യത്തിന്റെ 76-ാം സ്വാതന്ത്ര്യദിനം ആഘോഷിച്ച് യുഎഇയിലെ പാക് പ്രവാസികൾ. വീടുകൾ അലങ്കരിച്ചും ദേശീയ നിറത്തിലുള്ള പച്ച വസ്ത്രങ്ങൾ ധരിച്ചുമാണ് യുഎഇയിലെ പാക് കുടുംബങ്ങൾ സ്വാതന്ത്ര്യദിനം ആഘോഷിക്കുന്നത്. കുടുംബയോഗങ്ങളിലൂടെ ബന്ധുക്കളുമായും സുഹൃത്തുക്കളും ഒത്തുകൂടി രുചികരമായ വിഭവങ്ങളൊരുക്കി സൗഹൃദം പങ്കുവെച്ചാണ് ആഘോഷങ്ങൾക്ക് മാറ്റുകൂട്ടുന്നത്.
കഴിഞ്ഞ ഒരാഴ്ചക്കാലമായി യുഎഇയിലെ പാക് കുടുംബങ്ങളിൽ സ്വാതന്ത്ര്യദിനത്തിന് മുന്നോടിയായുള്ള ആഘോഷങ്ങൾ ആരംഭിച്ചിരുന്നു. 1947-ൽ ബ്രിട്ടീഷ് ഭരണം അവസാനിപ്പിച്ച് പാക്കിസ്ഥാൻ പരമാധികാര രാഷ്ട്രമായി മാറിയതിന്റെ 76 വർഷം വളരെ അഭിമാനത്തോടെ തന്നെയാണ് ഓരോ പൗരന്മാരും ആഘോഷിക്കുന്നത്. വീടുകൾ പച്ചയും വെള്ളയും നിറത്തിലുള്ള ബലൂണുകൾ ഉപയോഗിച്ച് അലങ്കരിക്കുകയും പാകിസ്ഥാനിലെ വിവിധ പ്രവിശ്യകളിൽ നിന്നുള്ളവർ തങ്ങളുടെ കുട്ടികളെ പരമ്പരാഗത വസ്ത്രങ്ങൾ അണിയിച്ചും ആഘോഷങ്ങൾക്ക് പകിട്ടേകി. യുഎഇയിലെ ഏറ്റവും ഉയർന്ന രണ്ടാമത്തെ പ്രവാസി ജനസംഖ്യ പാകിസ്ഥാനികളാണ്.
