മസ്കറ്റിലെ ബീച്ചുകളിലും മറ്റ് പൊതു ഇടങ്ങളിലും മാലിന്യം അലക്ഷ്യമായി വലിച്ചെറിയുന്നവരാണോ നിങ്ങൾ? എങ്കിലും സൂക്ഷിച്ചോളൂ, തക്കതായ ശിക്ഷ പുറകേ വരുന്നുണ്ട്. മാലിന്യം പൊതു സ്ഥലത്ത് വലിച്ചെറിയുന്നവർക്കെതിരെ കർശന നടപടിയെടുക്കാൻ മസ്കറ്റ് നഗരസഭാ അധികൃതർ തീരുമാനിച്ചു കഴിഞ്ഞു. നിയമം ലംഘിക്കുന്നവർക്ക് 100 റിയാലാണ്(ഏകദേശം 21,500 ഇന്ത്യൻ രൂപ) പിഴ ചുമത്തുക. നിയമലംഘനം ആവർത്തിച്ചാൽ പിഴ ഇരട്ടിയാക്കും. എല്ലാവരും പൊതു ഇടങ്ങൾ വൃത്തിയായി സൂക്ഷിക്കാൻ സഹകരിക്കണമെന്നും അധികൃതർ ആവശ്യപ്പെടുകയും ചെയ്തിട്ടുണ്ട്.
ബീച്ചുകളിലും പൊതു ഇടങ്ങളിലും മാലിന്യം നിക്ഷേപിക്കുന്നത് തടയാൻ കഴിഞ്ഞ വർഷം കൂടുതൽ മാലിന്യപ്പെട്ടികൾ സ്ഥാപിച്ചിരുന്നു. എന്നാൽ, പലരും ഇവ ഉപയോഗിക്കാൻ തയ്യാറായില്ല. നഗരസഭ സമൂഹ മാധ്യമ അക്കൗണ്ടുകളിൽ പൊതുസ്ഥലങ്ങളിൽ വലിയ അളവിൽ മാലിന്യം നിക്ഷേപിച്ചതിന്‍റെ ചിത്രങ്ങൾ പങ്കുവച്ചുകൊണ്ടാണ് പുതിയ ശിക്ഷയെക്കുറിച്ച് അറിയിച്ചിരിക്കുന്നത്. ബീച്ചകളിൽ മാലിന്യങ്ങൾ വലിച്ചെറിയുന്നത് മാത്രമല്ല, കാറുകളും സ്കൂട്ടറുകളും ഉപയോഗിക്കുന്നതും അപകടകരമാണെന്ന് നഗരസഭ മുന്നറിയിപ്പ് നൽകിയിട്ടുണ്ട്. വാഹനങ്ങളും മോട്ടോർ സൈക്കിളുകളും ബീച്ചുകളിൽ പ്രവേശിക്കുന്നത് നേരത്തേ തന്നെ നിരോധിച്ചിരിക്കുന്നു. സൂക്ഷിച്ചോളൂ, നിയമലംഘകർക്കെതിരെ പിഴ മാത്രമല്ല മറ്റ് നടപടികളും അധികൃതർ സ്വീകരിക്കും. പൊതു ഇടങ്ങൾ വൃത്തിയായി സൂക്ഷിക്കേണ്ടത് ഓരോരുത്തരുടെയും കടമയാണ്, അത് കൃത്യമായി നിർവഹിച്ച് മാതൃകയാവുക.
