ജീവകാരുണ്യ പ്രവർത്തനങ്ങൾക്കായി ധന സമാഹരണം നടത്തുന്നതിന് സൗദി അറേബ്യയിൽ പുതിയ വ്യവസ്ഥകൾ പ്രാബല്യത്തിൽ വന്നു. ഇനി മുതൽ സൗദി പൗരന്മാർക്കും ലൈസൻസുള്ള സ്ഥാപനങ്ങൾക്കും മാത്രമേ ധന സമാഹരണത്തിന് അനുമതി ലഭിക്കുകയുള്ളു. കൂടാതെ വിദേശത്ത് നിന്നെത്തുന്ന പണം സ്വീകരിക്കാൻ പാടില്ലെന്നും പുതിയ വ്യവസ്ഥയിലുണ്ട്.
ധനസമാഹരണം നടത്താൻ ഉദ്ദേശിക്കുന്നവർ മാനവ വിഭവശേഷി മന്ത്രാലയത്തിൽ നിന്ന് ആദ്യം ലൈസൻസ് നേടണം. ഇതിന് ശേഷം ബാങ്ക് അക്കൗണ്ട് തുടങ്ങുകയും വേണം. ഒരു വർഷത്തേക്കാണ് ലൈസൻസ് ലഭിക്കുക. ലൈസൻസുള്ള എൻ.ജി.ഒകൾക്ക് അവരുടെ ആസ്ഥാനം വഴിയോ ശാഖകൾ വഴിയോ സംഭാവനകൾ ശേഖരിക്കാം. കൂടാതെ പ്രത്യേക അനുമതിയില്ലാതെ രാജ്യത്തിന് പുറത്ത് നിന്ന് പണമോ ചെക്കുകളോ സ്വീകരിക്കാൻ പാടില്ല. രാജ്യത്തിന് പുറത്തുള്ള വ്യക്തിക്കോ സ്ഥാപനത്തിനോ ബന്ധപ്പെട്ട വകുപ്പിന്റെ അനുമതിയില്ലാതെ സംഭാവന നൽകരുതെന്നും പുതിയ നിയമത്തിലുണ്ട്.
കള്ളപ്പണം വെളുപ്പിക്കൽ അടക്കമുള്ള കുറ്റകൃത്യങ്ങൾ തടയുക, സംഭാവനകൾ ശേഖരിക്കുന്നതിൽ സുതാര്യത വർധിപ്പിക്കുക എന്നിവയാണ് പുതിയ നിയമം ലക്ഷ്യമിടുന്നതെന്ന് അധികൃതർ അറിയിച്ചു. പുതിയ വ്യവസ്ഥകളുമായി ബന്ധപ്പെട്ട മുഴുവൻ വിവരങ്ങളും മന്ത്രാലയത്തിന് സമർപ്പിക്കണമെന്നും അതോറിറ്റി വ്യക്തമാക്കി. അതേസമയം ലൈസൻസ് സംബന്ധിച്ച വ്യവസ്ഥകൾ ലംഘിച്ചാൽ ലൈസൻസ് പിൻവലിക്കുകയും സംഭാവനകൾ ശേഖരിക്കുന്നത് നിർത്തിവയ്ക്കുകയും വരുമാനം കണ്ടുകെട്ടുകയും ചെയ്യുമെന്ന് മാനവ വിഭവശേഷി മന്ത്രാലയം അറിയിച്ചു.
