മസ്‌കത്ത് നഗരസഭ സേവനങ്ങള്‍ ഇനി വാട്സാപ്പ് വഴിയും ലഭ്യമാകും. ജനങ്ങള്‍ക്ക് സുഗമമായ രീതിയിൽ ആശയവിനിമയം നടത്താനും പ്രധാന സേവനങ്ങള്‍ എളുപ്പത്തിൽ ലഭ്യമാക്കാനും ലക്ഷ്യമിട്ടാണ് മുഈന്‍ എന്ന വാട്സാപ്പ് സംവിധാനം ഒരുക്കിയിരിക്കുന്നത്. മസ്കത്തിൽ സമാപിച്ച സാങ്കേതികവിദ്യാ പ്രദര്‍ശനമായ കോമക്‌സ് 2023ലാണ് പുതിയ സംവിധാനം അവതരിപ്പിച്ചത്.
നിലവില്‍ ട്രയല്‍ പതിപ്പാണ് ഇറക്കിയിട്ടുള്ളത്. അഞ്ച് പ്രധാന സേവനങ്ങളും സ്വയമേവയുള്ള പ്രതികരണവുമാണ് മുഈന്റെ പ്രത്യേകത. കെട്ടിട പെര്‍മിറ്റ് പുതുക്കുക, കമ്പനി റജിസ്‌ട്രേഷന്‍, പാര്‍ക്കിങ് ടിക്കറ്റ് റദ്ദാക്കല്‍ അഭ്യര്‍ഥനകള്‍, ഇലക്ട്രോണിക് സേവനങ്ങളുമായി ബന്ധപ്പെട്ട റിപ്പോര്‍ട്ടുകള്‍ എന്നിവയാണ് നിലവില്‍ വാട്സാപ്പിലൂടെ ലഭിക്കുന്ന സേവനങ്ങൾ. മുനിസിപാലിറ്റിയുടെ മുപ്പതിലേറെ വരുന്ന സേവനങ്ങള്‍ ലയിപ്പിക്കുന്ന പ്രവര്‍ത്തനം പുരോഗമിക്കുകയാണ്.
