ആകാശത്ത് വർണക്കാഴ്ചയൊരുക്കി ഇന്ന് യുഎഇയിൽ ഉൽക്ക വർഷം ദൃശ്യമാകും. വർഷം തോറും പെയ്തിറങ്ങുന്ന പെഴ്സീയിഡ്സ് ഉൽക്കകൾ ഇന്ന് അർധരാത്രി മുതൽ പുലർച്ചെ 3വരെ ചന്ദ്രവെളിച്ചമില്ലാത്ത ആകാശത്ത് ദൃശ്യമാകും. ഉൽക്ക വർഷം കാണാൻ വിപുലമായ സൗകര്യം ഒരുക്കിയതായി ഷാർജ മെലീഹ അർക്കിയോളജിക്കൽ സെന്റർ അറിയിച്ചു.
ഷാർജ മെലീഹ ക്യാംപ് സൈറ്റിൽ വൈകുന്നേരം വൈകുന്നേരം 7 മണി മുതൽ പുലർച്ചെ വരെ ഉൽക്കവർഷം കാണാൻ സൗകര്യമൊരുക്കിയിട്ടുണ്ട്. മരുഭൂമിയുടെ നടുവിൽ ഏറ്റവും അനുയോജ്യമായ പ്രദേശമാണ് ആകാശ പഠനത്തിനായി തയ്യാറാക്കിയിരിക്കുന്നത്. സന്ദർശകർക്ക് ദൂരദർശിനിയിലൂടെ ഉൽക്ക വർഷം കാണുന്നതിനുള്ള സംവിധാനവും ഇവിടെയുണ്ട്.
മണിക്കൂറിൽ 50 മുതൽ 100 ഉൽക്കകൾ വരെയാണ് ആകാശത്ത് കാണാൻ സാധിക്കുക. ജൂലൈ പകുതി മുതൽ ഓഗസ്റ്റ് അവസാനം വരെ ഉൽക്കാവർഷം സജീവമാണെങ്കിലും ഇന്ന് രാത്രിയിലും നാളെ രാവിലെയുമാണ് അത് ഏറ്റവും തീവ്രമാകുന്നത്. ഭൂമിയിൽ എല്ലായിടത്തും ഈ ഉൽക്കവർഷം ദൃശ്യമാകുമെന്നാണ് വിലയിരുത്തൽ.
