ആകാശത്ത് ദൃശ്യവിരുന്നൊരുക്കി ഓഗസ്റ്റ് 12ന് യുഎഇയിൽ ഉൽക്ക വർഷം ദൃശ്യമാകും. വർഷം തോറും പെയ്തിറങ്ങുന്ന പെഴ്സീയിഡ്സ് ഉൽക്കകൾ 12ന് അർധരാത്രി മുതൽ പുലർച്ചെ 3വരെ ചന്ദ്രവെളിച്ചമില്ലാത്ത ആകാശത്ത് കൂടുതൽ ശോഭയോടെ ദൃശ്യമാകും.
മണിക്കൂറിൽ 50 മുതൽ 100 ഉൽക്കകൾ വരെയാണ് ആകാശത്ത് മിന്നിമറയുക. വർഷത്തിലെ ദീർഘവും വ്യക്തവുമായ ഉൽക്ക വർഷമാണ് 12ന് ദൃശ്യമാകുക. ജൂലൈ പകുതി മുതൽ ഓഗസ്റ്റ് അവസാനം വരെ ഉൽക്കാവർഷം സജീവമാണെങ്കിലു, ഓഗസ്റ്റ് 12-ന് രാത്രിയിലും പിറ്റേന്ന് രാവിലെയുമാണ് അത് ഏറ്റവും തീവ്രമാകുന്നത്. ഭൂമിയിൽ എല്ലായിടത്തും ഉൽക്കവർഷം ദൃശ്യമാകുമെന്നാണ് പ്രതീക്ഷിക്കുന്നത്.
ഉൽക്ക വർഷം കാണാൻ വിപുലമായ സൗകര്യം ഒരുക്കിയതായി ഷാർജ മെലീഹ അർക്കിയോളജിക്കൽ സെന്റർ അറിയിച്ചു. ഷാർജ മെലീഹ ക്യാംപ് സൈറ്റിൽ വൈകുന്നേരം വൈകുന്നേരം 7 മണി മുതൽ പുലർച്ചെ വരെ ഉൽക്കവർഷം കാണാൻ സൗകര്യമൊരുക്കും. മരുഭൂമിയുടെ നടുവിൽ ഏറ്റവും അനുയോജ്യമായ പ്രദേശമാണ് ആകാശ പഠനത്തിനായി തയ്യാറാക്കുന്നത്. സന്ദർശകർക്ക് ദൂരദർശിനിയിലൂടെ ഉൽക്ക വർഷം കാണുന്നതിനുള്ള സംവിധാനവും ഇവിടെ ഒരുക്കും.
