ഇന്ത്യയിൽ നിന്ന് ബിഎഡ് പഠനം കഴിഞ്ഞെത്തിയ ബഹ്റൈനിലെ പല അധ്യാപകരും സർട്ടിഫിക്കറ്റ് പരിശോധനയിൽ അയോഗ്യരായി. ഇന്ത്യയിലെ പല സർവകലാശാലകളിൽ നിന്ന് ബിഎഡ് കോഴ്സുകൾ പൂർത്തിയാക്കി ബഹ്റൈനിലെ സ്കൂളുകളിൽ ജോലിക്ക് ചേർന്നവരുടെ സർട്ടിഫിക്കറ്റുകൾ പോലും വർഷങ്ങൾക്ക് ശേഷം വിദ്യാഭ്യാസ മന്ത്രാലയം അയോഗ്യമാണെന്ന് കണ്ടെത്തി. ഇതോടെ ഇന്ത്യൻ അധ്യാപകർ ദുരിതത്തിലായിരിക്കുകയാണ്.
ക്വാഡ്രാ ബേ എന്ന രാജ്യാന്തര ഏജൻസിയാണ് ബഹ്റൈൻ മന്ത്രാലയത്തിന് വേണ്ടി സർട്ടിഫിക്കറ്റ് പരിശോധന നടത്തുന്നത്. സ്വന്തം ചെലവിൽ ക്വാഡ്രാ ബേയിൽ സർട്ടിഫിക്കറ്റുകൾ അപ്ലോഡ് ചെയ്ത ശേഷം അതിന്റെ ഫലം സ്കൂളുകൾ ഉറപ്പാക്കണമെന്ന മന്ത്രാലയം നിബന്ധനയേത്തുടർന്നാണ് അധ്യാപകരോട് സർട്ടിഫിക്കറ്റുകൾ അപ്ലോഡ് ചെയ്യാൻ സ്കൂൾ അധികൃതർ നിർദ്ദേശിച്ചത്. തുടർന്ന് ഭൂരിപക്ഷം അധ്യാപകരും അവരുടെ ഒറിജിനൽ സർട്ടിഫിക്കറ്റുകൾ ക്വാഡ്രാ ബേയിൽ സമർപ്പിച്ചു. ഇതോടെയാണ് പല അധ്യാപകരുടെയും സർട്ടിഫിക്കറ്റിന് അംഗീകാരം നഷ്ടപ്പെട്ടത്.
മുമ്പ് ഡൽഹിയിലേക്ക് അയച്ച് സ്റ്റാമ്പ് ചെയ്തുവരുത്തുന്ന രീതിയായിരുന്നു സർട്ടിഫിക്കറ്റ് വെരിഫിക്കേഷൻ നടത്തിയിരുന്നത്. അത് ബഹ്റൈനിലെ ചില ഏജൻസികൾ മുഖേനയാണ് ചെയ്തുവന്നിരുന്നത്. സർവകലാശാലകളുടെ ബിഎഡ് കോഴ്സുകൾ പലതും രാജ്യാന്തര തലത്തിൽ അംഗീകരിക്കപ്പെടാത്തതാണ് അധ്യാപകർക്ക് തിരിച്ചടിയായത്.
