ഈ വർഷം ആദ്യ പകുതിയിൽ കുവൈറ്റിലെ ഗുരുതര കുറ്റകൃത്യ നിരക്ക് 25% കുറഞ്ഞതായി റിപ്പോർട്ട്‌. ആഭ്യന്തര മന്ത്രാലയം നടപ്പാക്കിവരുന്ന നൂതന സുരക്ഷാ സംവിധാനമാണ് കുറ്റകൃത്യ നിരക്ക് കുറയാനുള്ള കാരണമെന്ന് മന്ത്രി ഷെയ്ഖ് തലാൽ അൽ ഖാലിദ് അൽ സബാഹ് പറഞ്ഞു.
ബാങ്ക് കവർച്ച, കൊലപാതകം, മോഷണം, സുരക്ഷാ ഉദ്യോഗസ്ഥർക്കു നേരെയുള്ള ആക്രമണം, ഭവനഭേദനം, ഭീഷണി തുടങ്ങിയവയിലാണ് കുറവ് വന്നിരിക്കുന്നത്. മദ്യം, ലഹരി മരുന്ന് എന്നിവയ്ക്കെതിരായ പരിശോധന വ്യാപകമാക്കിയതും കുറ്റകൃത്യങ്ങളുടെ തോത് കുറച്ചിട്ടുണ്ട്.
ഈ വർഷം ഇതുവരെ വിവിധ നിയമ ലംഘനങ്ങളുടെ പേരിൽ അറസ്റ്റിലായ 11,000 പേരെ നാടുകടത്തിയതായും അധികൃതർ അറിയിച്ചു. ഇവരിൽ ഇന്ത്യ, ശ്രീലങ്ക,ഫിലിപ്പീൻസ്, ഈജിപ്ത് രാജ്യക്കാർ ഉൾപ്പെടും. നാടുകടത്തൽ കേന്ദ്രങ്ങളിൽ കഴിയുന്നവർ ഇതിനു പുറമെയാണ്.
