ബയോമെട്രിക് അപ്പോയിൻമെന്റ് ഇനി സഹൽ ആപ്പ് വഴിയും ഷെഡ്യൂൾ ചെയ്യാം. സഹൽ ആപ്പ് ഔദ്യോഗിക വക്താവ് യൂസുഫ് കാസമാണ് പുതിയ സേവനത്തെക്കുറിച്ച് അറിയിച്ചത്. സഹല്‍ വരിക്കാര്‍ ആപ്ലിക്കേഷനിൽ ലോഗിൻ ചെയ്തതിന് ശേഷം ‘അപ്പോയിൻമെന്റുകൾ’എന്ന വിഭാഗം വഴിയാണ് ഇതിനായി ശ്രമിക്കേണ്ടത്. തുടര്‍ന്ന് ‘അപ്പോയിൻമെന്റ് ബുക്ക് ചെയ്യുക’എന്ന ഒപ്ഷന്‍ തിരഞ്ഞെടുക്കുക. ആവശ്യമായ വിവരങ്ങള്‍ നല്‍കി ബുക്കിങ് പൂര്‍ത്തിയാക്കാമെന്ന് യൂസുഫ് കാസം പറഞ്ഞു.
ബുക്കിങ് പൂര്‍ത്തിയാക്കി കഴിഞ്ഞാല്‍ കുവൈറ്റ് മൊബൈൽ ഐഡി ആപ്പിലേക്ക് ഇതുസംബന്ധമായ നോട്ടിഫിക്കേഷന്‍ ലഭിക്കും. അതേസമയം നിലവില്‍ ‘മിതാ’വെബ് പ്ലാറ്റ്ഫോം വഴിയും ബയോമെട്രിക് അപ്പോയിൻമെന്റുകള്‍ ബുക്ക് ചെയ്യാനുള്ള അവസരമുണ്ട്. കഴിഞ്ഞ ദിവസമാണ് രാജ്യത്ത് ബയോമെട്രിക് രജിസ്ട്രേഷന്‍ നിര്‍ബന്ധമാക്കി ആഭ്യന്തര മന്ത്രാലയം ഉത്തരവ് പ്രഖ്യാപിച്ചത്. മാർച്ച് ഒന്നു മുതൽ മൂന്നു മാസത്തിനുള്ളിൽ സ്വദേശികളും പ്രവാസികളും ബയോമെട്രിക് ഫിംഗർപ്രിന്റ് രജിസ്ട്രേഷന്‍ നിർബന്ധമായും പൂര്‍ത്തിയാക്കിയിരിക്കണം.
