വിസ നിയമങ്ങൾ ഭേദഗതി ചെയ്യാനൊരുങ്ങി കുവൈത്ത്. പ്രവാസികൾക്ക് പരമാവധി അഞ്ച് വർഷത്തേയ്ക്കായിരിക്കും ഇനി റെസിഡൻസി വിസ അനുവദിക്കുക. റിയൽ എസ്റ്റേറ്റ് ഉടമകൾക്ക് പത്തുവർഷത്തേക്കും വിദേശ നിക്ഷേപകർക്ക് പരമാവധി 15 വർഷത്തേയ്ക്കുമാണ് റെസിഡൻസി വിസ ലഭിക്കുക. നിലവിലുള്ള നിയമ പ്രകാരം വിസ കച്ചവടം നടത്തിയാൽ പരമാവധി മൂന്ന് വർഷം തടവും 5,000 ദിനാർ മുതൽ 10,000 ദിനാർ വരെ പിഴയുമാണ് ചുമത്തപ്പെടുക. ഇത് സംബന്ധമായ അന്തിമമായ നിർദ്ദേശം മന്ത്രിമാരുടെ കൗൺസിലാണ് തീരുമാനിക്കുക.
പൊതുമേഖലാ സ്ഥാപനങ്ങളിൽ ജോലി ചെയ്യുന്ന പ്രവാസികൾക്ക് സ്ഥാപനത്തിന്റെ അംഗീകാരമില്ലാതെ മറ്റൊരു പൊതുമേഖലാ സ്ഥാപനത്തിൽ ജോലി ചെയ്യാൻ സാധിക്കില്ല. പുതിയ ശുപാർശ പ്രകാരം തൊഴിലുടമയുടെ അംഗീകാരമില്ലാതെ ഗാർഹിക തൊഴിലാളിക്ക് റസിഡൻസി കൈമാറ്റവും അനുവദിക്കില്ല. കൂടാതെ രാജ്യത്തെ നിയമം ലംഘിക്കുന്നവരെ എപ്പോൾവേണമെങ്കിലും നാടുകടത്താൻ അധികൃതർക്ക് അധികാരമുണ്ടായിരിക്കുമെന്നും ബില്ലിൽ നിർദ്ദേശിക്കുന്നുണ്ട്.
