ജോലി അന്വേഷിക്കുന്നവരാണോ നിങ്ങൾ. എങ്കിൽ ഇതാ ഒരു സുവർണാവസരം. സൗജന്യ വിസയിൽ മിഡിൽ ഈസ്റ്റിലേക്ക് നിരവധി തൊഴിൽ അവസരങ്ങൾ ഒരുക്കുകയാണ് ലുലു ഗ്രൂപ്പ്. 15ലധികം വിഭാഗങ്ങളിലേക്ക് നേരിട്ടാണ് അഭിമുഖം നടത്തുന്നത്. പുരുഷന്മാർക്കാണ് ഇത്തവണ അപേക്ഷിക്കാൻ അവസരമുള്ളത്. മെയ് 14-ന് കോഴിക്കോടും 16-ന് തൃശൂരും വെച്ചാണ് അഭിമുഖങ്ങൾ നടത്തപ്പെടുക.
അക്കൗണ്ടന്റ്, ഐടി സപ്പോർട്ട് സ്റ്റാഫ്, സെയിൽസ്മാൻ, കാഷ്യർ, കുക്ക്, ബേക്കർ, ബുച്ചർ, ഫിഷ്മാഗർ, ടെയ്ലർ, സെക്യൂരിറ്റി, ഇലക്ട്രീഷ്യൻ, ആർട്ടിസ്റ്റ്, ഗ്രാഫിക്സ് ഡിസൈനർ, സ്നാക് മേക്കർ, സാൻഡ്വിച്ച് – ഷവർമ്മ – സലാഡ് മേക്കർ എന്നീ ഒഴിവുകളിലേയ്ക്കാണ് ഉദ്യോഗാർത്ഥികളെ ക്ഷണിക്കുന്നത്. എംകോം യോഗ്യതയുള്ളവർക്ക് അക്കൗണ്ടന്റ് തസ്കിയിലേക്കും ബിസിഎയോ മൂന്ന് വർഷ ഐടി ഡിപ്പോമയോ ഉള്ളവർക്ക് ഐടി സപ്പോർട്ട് സ്റ്റാഫ് ഒഴിവിലേക്കും അപേക്ഷ സമർപ്പിക്കാം. 30 വയസാണ് പ്രായപരിധി.
പ്ലസ് ടുവും രണ്ട് വർഷത്തെ പ്രവർത്തി പരിചയവും ഉള്ളവർക്ക് സെയിൽസ്മാൻ, ക്യാഷർ തസ്തികയിലേക്ക് അപേക്ഷിക്കാം. 20 മുതൽ 28 വരെയാണ് ഇതിനുള്ള പ്രായപരിധി. മൂന്ന് വർഷത്തെ തൊഴിൽപരിചയവും 23 മുതൽ 35 വരെ പ്രായവും ഉള്ളവർക്ക് കുക്ക്, ബേക്കർ, കോൺഫെക്ഷനർ, ബുച്ചർ, ഫിഷാംഗർ, ടെയ്ലർ, സെക്യൂരിറ്റി, ഇലക്ട്രീഷ്യൻ, ആർട്ടിസ്റ്റ്, ഗ്രാഫിക് ഡിസൈനർ, സ്നാക് മേക്കർ, സാൻഡ്വിച്ച് – ഷവർമ്മ – സലാഡ് മേക്കർ എന്നീ ഒഴിവുകളിലേയ്ക്കും അപേക്ഷിക്കാൻ സാധിക്കും.
വിശദമായ ബയോഡേറ്റ, കളർ പാസ്പോർട്ട് കോപ്പി, വിദ്യാഭ്യാസ യോഗ്യതാ സർട്ടിഫിക്കറ്റുകൾ, ഫോട്ടോ എന്നിവയുമായാണ് അഭിമുഖത്തിന് എത്തേണ്ടത്. കോഴിക്കോട് സുമംഗലി ഓഡിറ്റോറിയം, തൃശൂർ ലുലു കൺവെൻഷൻ സെന്റർ (ഹയാത്ത്) എന്നിവിടങ്ങളിൽ വെച്ച് രാവിലെ 9 മണി മുതൽ മൂന്ന് വരെയാണ് അഭിമുഖം നടക്കുക.
