ഹമദ് മെഡിക്കൽ കോർപ്പറേഷന്റെ (എച്ച്എംസി) കീഴിലുള്ള സൈക്യാട്രിക് ആശുപത്രിയിലെ മാനസികാരോഗ്യ കിടത്തി ചികിത്സാ സേവനങ്ങൾ താൽക്കാലികമായി മിസൈദ് ജനറൽ ആശുപ്രതിയിലേക്ക് മാറ്റും. സൽവ റോഡിലെ സൈക്യാട്രിക് ആശുപ്രതിയിൽ നവീകരണം നടക്കുന്നതിനാലാണ് ഈ മാറ്റമെന്ന് അധികൃതർ വ്യക്തമാക്കി.
ഈ മാസം അവസാനിക്കുന്നതിന് മുമ്പ് സേവനങ്ങൾ മാറ്റിത്തുടങ്ങും. ക്ലിനിക്കൽ ട്രാൻസ്ഫർ നടപടികൾ പൂർത്തിയാകുന്നതിന് അനുസരിച്ച് രോഗികളെ മിസൈദ് ജനറൽ ആശുപത്രിയിലേയ്ക്ക് മാറ്റും. മാനസിക ബുദ്ധിമുട്ട് അനുഭവിക്കുന്നവർക്ക് ഏറ്റവും ഉചിതമായ പരിചരണമായിരിക്കും മിസൈദ് ജനറൽ ആശുപത്രിയിൽ ഉറപ്പാക്കുകയെന്ന് അധികൃതർ വ്യക്തമാക്കി.
മാനസിക പിന്തുണ ആവശ്യമുള്ളവർക്ക് എച്ച്എംസിയുടെ നാഷണൽ മെന്റൽ ഹെൽത്ത് ഹെൽപ് ലൈനുമായി ബന്ധപ്പെടാമെന്നും സ്വകാര്യത ഉറപ്പാക്കിയാണ് ആശുപത്രിയിൽ സേവനങ്ങൾ ലഭ്യമാക്കുന്നതെന്നും അധികൃതർ അറിയിച്ചു.
