26-ാമത് അറേബ്യൻ ഗൾഫ് കപ്പ് ഫുട്ബോൾ ടൂർണമെന്റിന് നാളെ തുടക്കമാകും. ഡിസംബർ 21 മുതൽ 2025 ജനുവരി മൂന്ന് വരെയാണ് ടൂർണമെന്റ് നടത്തപ്പെടുക. ടൂർണമെന്റിൽ 10 തവണ കിരീടം സ്വന്തമാക്കിയ കുവൈത്താണ് ഇത്തവണ ആതിഥേയ രാജ്യം.
1970-ൽ ബഹ്റൈനിൽ നടന്ന ആദ്യ ഗൾഫ് കപ്പ് ടൂർണമെൻ്റിൽ കുവൈത്തായിരുന്നു കിരീടം സ്വന്തമാക്കിയത്. 2010-ൽ യെമനിൽ നടന്ന 20-ാമത് ഗൾഫ് കപ്പിൽ സൗദി അറേബ്യയെ 1-0 ന് തോൽപ്പിച്ചാണ് കുവൈത്ത് അവസാനമായി ജേതാക്കളായത്. ചാമ്പ്യൻഷിപ്പ് വീണ്ടും തിരിച്ചുപിടിക്കാനുള്ള ശ്രമത്തിലാണ് ഇത്തവണ കുവൈത്ത്.
രണ്ട് വർഷത്തിലൊരിക്കൽ നടക്കുന്ന ഗൾഫ് കപ്പിന്റെ തുടക്കത്തിൽ ബഹ്റൈൻ, ഖത്തർ, കുവൈത്ത്, സൗദി അറേബ്യ എന്നീ നാല് രാജ്യങ്ങൾ മാത്രമേ പങ്കെടുത്തിരുന്നുള്ളൂ. പിന്നീട് ഒമാൻ, യുഎഇ, ഇറാഖ്, യെമൻ എന്നീ രാജ്യങ്ങളെ കൂടി ഉൾപ്പെടുത്തുകയായിരുന്നു. ഇപ്പോൾ 8 ടീമുകളാണ് ടൂർണമെന്റിൽ മാറ്റുരയ്ക്കുന്നത്.
