കൊത്തുപണികൾകൊണ്ട് മനോഹരമാക്കിയ അബുദാബിയിലെ ബാപ്സ് ഹിന്ദു ക്ഷേത്രം സന്ദർശകർക്കായി തുറന്നുകൊടുത്തതോടെ ജനങ്ങളുടെ വലിയ തിരക്കാണ് അനുഭവപ്പെടുന്നത്. മന്ദിർ സന്ദർശിക്കാനാഗ്രഹിക്കുന്നവരാണ് നിങ്ങൾ എങ്കിൽ അധികൃതർ നിർദേശിച്ചിരിക്കുന്ന ചില കാര്യങ്ങൾ നിർബന്ധമായും പാലിക്കണം. അത് എന്തൊക്കെയാണെന്ന് നോക്കാം.
• മാന്യമായ വസ്ത്രം ധരിച്ച് വേണം ക്ഷേത്രത്തിൽ പ്രവേശനം നടത്താൻ എന്നതാണ് പ്രധാന നിർദേശം. സന്ദർശകർ അവരുടെ തോളും കാൽമുട്ടുകളും മൂടുന്ന വസ്ത്രം വേണം ധരിക്കാൻ. വസ്ത്രങ്ങളിൽ ആക്ഷേപകരമായ ഡിസൈനുകളും മുദ്രാവാക്യങ്ങളും കർശനമായി നിരോധിച്ചിട്ടുണ്ട്. സുതാര്യമോ അർദ്ധസുതാര്യമോ ഇറുകിയതോ ആയ വസ്ത്രങ്ങളും നിരോധിച്ചു.
• വളർത്തുമൃഗങ്ങളെ സന്ദർശകർക്കൊപ്പം ക്ഷേത്രത്തിൽ പ്രവേശിക്കാൻ അനുവദിക്കില്ല. കൂടാതെ പുറത്തുനിന്നുള്ള ഭക്ഷണപാനീയങ്ങളും കയ്യിൽ കരുതാൻ പാടില്ല.
• അധികൃതരിൽ നിന്ന് അനുമതി വാങ്ങുകയും അംഗീകൃത ജീവനക്കാരെ അറിയിക്കുകയും ചെയ്യാതെ ക്ഷേത്രപരിസരത്ത് ഡ്രോണുകൾ ഉപയോഗിക്കുന്നത് കർശനമായി നിരോധിച്ചിട്ടുണ്ട്.
• കുട്ടികൾ രക്ഷിതാക്കളോടൊപ്പമല്ലാതെ ഒറ്റയ്ക്ക് വരുന്നത് നിരോധിച്ചിട്ടുണ്ട്. അതോടൊപ്പം വലിയ ബാക്ക്പാക്കുകൾ, ക്യാബിൻ ലഗേജ് തുടങ്ങിയവയും ക്ഷേത്രത്തിനുള്ളിൽ പ്രവേശിപ്പിക്കില്ല. കൂടാതെ ആയുധങ്ങളും മുർച്ചയുള്ള വസ്തുക്കളും വിലക്കിയിട്ടുണ്ട്.
• പുകവലി ക്ഷേത്ര പരിസരത്ത് നിരോധിച്ചു. അതോടൊപ്പം മദ്യം, വീഞ്ഞ്, മറ്റ് ലഹരിപാനീയങ്ങൾ എന്നിവ ഉൾപ്പെടെയുള്ളവയുടെ ഉപയോഗവും ഇവ കയ്യിൽ കരുതുന്നതും നിരോധിച്ചു. മദ്യപിച്ചെത്തുന്നവർക്കും പ്രവേശനം ലഭിക്കില്ല.
• സന്ദർശകർ ക്ഷേത്രത്തിൽ പ്രവേശിക്കുന്നതിന് മുൻപ് അവരുടെ ചെരുപ്പ്, ഷൂസ് എന്നിവ അഴിച്ചുവയ്ക്കണം. ഇവ സൂക്ഷിക്കുന്നതിനായി പ്രത്യേക സൗകര്യമൊരുക്കിയിട്ടുണ്ട്. ഇവിടെ നഗ്നപാദനായി നടക്കുമ്പോൾ ചൂടേൽക്കാതിരിക്കാൻ പ്രത്യേക താപനില നിയന്ത്രിത ടൈലുകൾ സ്ഥിപിച്ചിട്ടുണ്ട്.
• ക്ഷേത്രത്തിൻ്റെ പുറംഭാഗത്ത് മൊബൈൽ ഫോണുകളും ചിത്രങ്ങളും അനുവദനീയമാണെങ്കിലും അവ ക്ഷേത്രത്തിനുള്ളിൽ കർശനമായി നിരോധിച്ചിരിക്കുന്നു. ഫോണുകൾ സ്വിച്ച് ഓഫ് ചെയ്യുകയോ സൈലന്റ് മോഡിൽ ഇടുകയോ വേണം.
• വീൽചെയറിൽ എത്തുന്ന സന്ദർശകരെ ഉൾക്കൊള്ളാനുള്ള സൗകര്യങ്ങൾ ക്ഷേത്രത്തിലുണ്ട്. ഇത്തരക്കാർക്ക് പ്രത്യേക സഹായവും ഇവിടെ ലഭ്യമാക്കും.
• ക്ഷേത്രത്തിനുള്ളിലെ ആത്മീയ അന്തരീക്ഷം സംരക്ഷിക്കുന്നതിനായി സന്ദർശകർ നിശബ്ദത പാലിക്കണം. കൂടാതെ ക്ഷേത്ര ഭിത്തികളിലെ കൊത്തുപണികൾ, അലങ്കാരങ്ങൾ, പെയിൻ്റിങ്ങുകൾ, സംരക്ഷണ കവറുകൾ എന്നിവയിൽ സന്ദർശകർക്ക് തൊടാൻ അനുവാദവുമില്ല.
• ക്ഷേത്രപരിസരത്ത് തുപ്പുകയോ മാലിന്യം വലിച്ചെറിയുകയോ ചെയ്യരുത്.
• വാണിജ്യേതര ആവശ്യങ്ങൾക്കായി വ്യക്‌തിഗത ഫൊട്ടോഗ്രാഫിയും വീഡിയോ റെക്കോർഡിങ്ങും അനുവദനീയമാണ്.
