ഷാർജയിൽ ഫ്രഞ്ച് കൗമാരക്കാരിയെ കാണാതായി. ഷാർജ ഗ്രാൻഡ് മോസ്‌കിന് സമീപത്തെ വീട്ടിൽ നിന്നാണ് മെലിൻ എന്ന 17കാരിയെ കാണാതായത്. പിതാവ് ഡേവിഡ് ക്രോയിസറിന്റെ പരാതിയുടെ അടിസ്ഥാനത്തിൽ മെലിനെ കണ്ടെത്തുന്നതിനായി ഷാർജ പൊലീസ് ഊർജ്ജിതമായ അന്വേഷണം ആരംഭിച്ചിട്ടുണ്ട്.
മാർച്ച് 25 തിങ്കളാഴ്ച പുലർച്ചെ 1 മണിക്കും 5 മണിക്കും ഇടയിലാണ് അൽ റിഖൈബയിലെ അൽ സുയോഹ് സബർബിൽ നിന്നാണ് മെലിനെ കാണാതാകുന്നത്. ഇതോടെ സാധ്യമായ എല്ലാ സ്ഥലങ്ങളിലും കുടുംബം അന്വേഷിക്കുകയും ചെയ്തു. എന്നാൽ യാതൊരു ഫലവും ലഭിക്കാതെ വന്നതോടെ കുടുംബം ഷാർജ പൊലീസിൽ വിവരമറിയിക്കുകയായിരുന്നു. ഇതോടെ പൊലീസ് സ്ഥലത്തെത്തി അന്വേഷണവും ആരംഭിച്ചു. സാമൂഹ്യമാധ്യമങ്ങളിലും വ്യാപകമായി മെലിന്റെ ദൃശ്യങ്ങൾ പങ്കുവെച്ച് അന്വേഷണം നടത്തുന്നുണ്ട്.
എന്നാൽ മെലിനെ കാണാതായി 37 മണിക്കൂറുകൾ പിന്നിട്ടിട്ടും ഇതുവരെ കണ്ടെത്താൻ സാധിച്ചിട്ടില്ല. വിവിധ സ്ഥലങ്ങളിലെ സിസിടിവി ദൃശ്യങ്ങൾ പരിശോധിക്കുന്ന പൊലീസ് ഡ്രോൺ ഉപയോഗിച്ചും മെലിനെ കണ്ടെത്താൻ ശ്രമിക്കുകയാണ്. കാണാതാകുമ്പോൾ മെലിൻ ധരിച്ചിരുന്ന വേഷം എന്താണെന്ന് കൃത്യമായി ധാരണയില്ലെങ്കിലും ഇളം നീല ഈസ്റ്റ്പാക്ക് ബാക്ക്പാക്കും കറുത്ത ഹെഡ് ഫോണും നീലയും പച്ചയും കലർന്ന സ്പോർട്സ് ഷൂകളുമാണ് ധരിച്ചിരിക്കുകയെന്നാണ് കുടുംബം വ്യക്തമാക്കുന്നത്.
മെലിനെ കണ്ടെത്താൻ സാധിക്കുമെന്ന പ്രതീക്ഷയിൽ തന്നെയാണ് ഈ കുടുംബം. 17കാരിയുമായി ബന്ധപ്പെട്ട് എന്തെങ്കിലും വിവരം ലഭിക്കുന്നവർ ഷാർജ പൊലീസുമായോ +971 55 718 8205, +971 50 94 93 165 എന്ന നമ്പറിലോ അറിയിക്കണമെന്ന് അധികൃതർ അറിയിച്ചു.
