പ്രജനന കാലത്തെ മീൻപിടിത്തം തടയുന്നതിന്റെ ഭാഗമായി കർശന മാർഗനിർദേശവുമായി ദോഹ നഗരസഭ. കടലിലെ മത്സ്യസമ്പത്ത് സംരക്ഷിക്കുന്നതിനായി അയക്കൂറയെ (കിങ് ഫിഷ്) പിടിക്കുന്നതിന് വിലക്കേർപ്പെടുത്തിയിരിക്കുകയാണ് നഗരസഭാ മന്ത്രാലയത്തിലെ ഫിഷറീസ് വകുപ്പ്. നിയമം ലംഘിച്ചാൽ 5,000 റിയാലാണ് പിഴയായി ഈടാക്കുക. 2 മാസത്തേക്കാണ് വിലക്ക് ഏർപ്പെടുത്തിയിരിക്കുന്നത്.
പ്രജനന കാലത്ത് മീൻപിടിക്കുന്നത് മീനുകളുടെ നിലനിൽപ്പിന് ഭീഷണിയായതിനാലാണ് നിയന്ത്രണം ഏർപ്പെടുത്തിയിരിക്കുന്നത്. ഒക്ടോബർ 15 വരെയാണ് ഈ നിയന്ത്രണം നീണ്ടുനിൽക്കുക. നിരോധിത കാലയളവിൽ വല ഉപയോഗിച്ച് അയക്കൂറയെ പിടിക്കാൻ പാടില്ല. മത്സ്യബന്ധനത്തിന് ഉപയോഗിക്കുന്ന ഹലാഖ് എന്ന പ്രത്യേകതരം വലയുടെ വിൽപനയും വല ബോട്ടുകളിൽ കൊണ്ടുപോകുന്നതും നിരോധിച്ചിട്ടുണ്ട്. നിരോധിത കാലയളവിൽ നഗരസഭ-പരിസ്ഥിതി മന്ത്രാലയങ്ങളിൽ നിന്നുള്ള ലൈസൻസ് എടുത്തശേഷം ഗവേഷണത്തിന് വേണ്ടി അയക്കൂറയെ പിടിക്കുന്നതിന് അനുമതി നൽകിയിട്ടുണ്ട്.
ഫിഷറീസ് വകുപ്പിന്റെ ലൈസൻസുള്ള ബോട്ടുകൾക്കും ചെറുകപ്പലുകൾക്കും ഈ കാലയളവിൽ ചൂണ്ട ഉപയോഗിച്ച് മീൻപിടിക്കാൻ അനുവാദമുണ്ട്. മറ്റ് ഉപകരണങ്ങൾ ഉപയോഗിച്ചുള്ള മീൻ പിടിത്തവും നിരോധിച്ചു. നിയമലംഘനം നടത്തുന്നവർക്കെതിരെ ശക്തമായ നടപടി സ്വീകരിക്കുമെന്നും അധികൃതർ അറിയിച്ചു.
