വേനലവധി ആരംഭിച്ചതോടെ യാത്രക്കാരുടെ എണ്ണം വർധിച്ചതിനേത്തുടർന്ന് ഷാർജയിൽനിന്ന് കണ്ണൂരിലേക്കും തിരിച്ചും രണ്ട് അധിക സർവീസുകൾ ആരംഭിക്കുമെന്ന് പ്രഖ്യാപിച്ച് എയർ ഇന്ത്യ. എയർ ഇന്ത്യ എക്സ്പ്രസ്, എയർ ഏഷ്യ ഇന്ത്യ എം.ഡി. അലോക് സിങ് ആണ് ഇതുസംബന്ധിച്ച അറിയിപ്പ് നൽകിയത്. ജൂൺ 23 മുതൽ സർവീസ് ആരംഭിക്കും. കൂടുതൽ വിമാനങ്ങൾ ലഭ്യമാകുന്നതിന് അനുസരിച്ച് കണ്ണൂരിന് പ്രഥമ പരിഗണന നൽകുമെന്നും അദ്ദേഹം പറഞ്ഞു.
ചൊവ്വ, വെള്ളി ദിവസങ്ങളിലായിരിക്കും പുതിയ വിമാന സർവീസ് ഉണ്ടാകുക. ചൊവ്വാഴ്ച വൈകിട്ട് കണ്ണൂരിൽ നിന്ന് ഇന്ത്യൻ സമയം 3.15ന് പുറപ്പെടുന്ന വിമാനം യുഎഇ സമയം 5.35ന് ഷാർജയിൽ എത്തും. ഷാർജയിൽ നിന്ന് യുഎഇ സമയം വൈകിട്ട് 6.35ന് പുറപ്പെടുന്ന വിമാനം ഇന്ത്യൻ സമയം രാത്രി 11.50ന് കണ്ണൂരിലെത്തും.
വെള്ളിയാഴ്ച കണ്ണൂരിൽനിന്ന് രാത്രി ഇന്ത്യൻസമയം സമയം 10.35ന് വിമാനം പുറപ്പെട്ട് യുഎഇ സമയം രാത്രി 1 മണിക്ക് ഷാർജയിൽ എത്തുകയും തിരിച്ച് ഷാർജയിൽ നിന്ന് യുഎഇ സമയം 11 മണിക്ക് പുറപ്പെട്ട് ഇന്ത്യൻ സമയം പുലർച്ചെ 4.15ന് കണ്ണൂരിലെത്തുകയും ചെയ്യും.
