അബുദാബി ബാപ്സ് ഹിന്ദു ക്ഷേത്രം സന്ദർശിക്കാൻ ആഗ്രഹിക്കുന്നവരാണോ നിങ്ങൾ. എങ്കിൽ തിരക്കില്ലാതെ സൗകര്യപ്രദമായി ക്ഷേത്രം സന്ദർശിക്കാൻ അവസരമൊരുക്കുകയാണ് അധികൃതർ. ഇതിനായി മുൻകൂർ രജിസ്‌ട്രേഷൻ ആണ് ആരംഭിച്ചിരിക്കുന്നത്.
സന്ദർശകർക്ക് കൂടുതൽ സൗകര്യപ്രദവും ആസ്വാദ്യകരവുമായ അനുഭവം ഉറപ്പാക്കുന്നതിന്റെ ഭാഗമായാണ് പുതിയ നീക്കം. ഇതനുസരിച്ച് ക്ഷേത്രത്തിലെത്തുന്നവർക്ക് അധികം കാത്തിരിക്കാതെ സന്ദർശനം പൂർത്തിയാക്കി മടങ്ങാനും സാധിക്കും. സന്ദർശകർക്ക് സൗകര്യപ്രദമായ ദിവസവും സമയവും ഇതുവഴി തിരഞ്ഞെടുക്കാൻ സാധിക്കും. ആഴ്ചയിൽ ചൊവ്വ മുതൽ ഞായർ വരെ രാവിലെ 9 മുതൽ രാത്രി 8 വരെയാണ് ക്ഷേത്രം പൊതുജനങ്ങൾക്കായി തുറന്നുനൽകുക. അതേസമയം തിങ്കളാഴ്ചകളിൽ ക്ഷേത്രം അടച്ചിടുകയും ചെയ്യും.
ക്ഷേത്രം ഔദ്യോഗികമായി സന്ദർശകർക്കായി തുറന്നത് മുതൽ ദിവസേന ആയിരക്കണക്കിന് ജനങ്ങളാണ് ഇവിടേയ്ക്ക് എത്തുന്നത്. അതിനാൽ ക്ഷേത്രത്തിൽ തിരക്കും വർധിച്ചിരുന്നു. ഇത് ഒഴിവാക്കുന്നതിനായാണ് ബുക്കിങ് ആരംഭിച്ചിരിക്കുന്നത്. കൂടുതൽ വിവരങ്ങൾക്കും രജിസ്ട്രേഷനുമായി https://www.mandir.ae/visit എന്ന വെബ്സൈറ്റ് സന്ദർശിക്കാമെന്ന് അധികൃതർ അറിയിച്ചു.
