യുഎഇയിൽ ഇനി സ്വകാര്യ ട്യൂഷൻ ക്ലാസുകൾ നടത്തുന്നതിനായി സൗജന്യ വർക്ക് പെർമിറ്റ് അനുവദിക്കും. മാനവ വിഭവശേഷി എമിറേറ്റൈസേഷൻ മന്ത്രാലയവും വിദ്യാഭ്യാസ മന്ത്രാലയവും സംയുക്തമായാണ് പുതിയ വർക്ക് പെർമിറ്റ് അനുവദിക്കുന്നത്.
അനധികൃതമായി ട്യൂഷൻ എടുക്കുന്നത് തടയുന്നതിന്റെ ഭാഗമായാണ് നടപടി. രണ്ട് വർഷത്തേയ്ക്ക് സൗജന്യമായാണ് പെർമിറ്റ് അനുവദിക്കുന്നത്. സർക്കാർ അല്ലെങ്കിൽ സ്വകാര്യ സ്കൂളുകളിലെ രജിസ്റ്റർ ചെയ്ത അധ്യാപകർ, സർക്കാർ – സ്വകാര്യ മേഖലകളിലെ ജീവനക്കാർ, തൊഴിൽരഹിതർ, 15 മുതൽ 18 വരെ പ്രായമുള്ള സ്കൂൾ വിദ്യാർത്ഥികൾ, യൂണിവേഴ്സിറ്റി വിദ്യാർത്ഥികൾ എന്നിവർക്കാണ് ഈ വർക്ക് പെർമിറ്റിന് അപേക്ഷിക്കാൻ സാധിക്കുക.
യോഗ്യരായ അപേക്ഷകർക്ക് മാനവ വിഭവശേഷി, എമിറേറ്റൈസേഷൻ മന്ത്രാലയത്തിന്റെ സ്മാർട്ട് ആപ്ലിക്കേഷൻ, വെബ്സൈറ്റ് അല്ലെങ്കിൽ ഇ-സേവന സംവിധാനം വഴി പെർമിറ്റിനായി അപേക്ഷ സമർപ്പിക്കാൻ സാധിക്കും. മന്ത്രാലയത്തിന്റെ അനുമതിയില്ലാതെ സ്വകാര്യ ട്യൂഷനുകൾ എടുക്കുന്ന വ്യക്തികളിൽ നിന്നും പിഴ ഈടാക്കുമെന്ന് അധികൃതർ മുന്നറിയിപ്പ് നൽകി.
