ബലിപെരുന്നാളിന് യുഎഇയിൽ അഞ്ച് ദിവസം നീണ്ടുനിൽക്കുന്ന അവധിക്ക് സാധ്യത. ജ്യോതിശാസ്ത്ര കണക്കുകൂട്ടലുകൾ അനുസരിച്ച് അറഫാ ദിനം ജൂൺ 16 (ഞായറാഴ്ച) ആണെങ്കിൽ ജൂൺ 19 (ബുധനാഴ്ച) വരെ അവധിയായിരിക്കും. വാരാന്ത്യത്തിലെ (ജൂൺ 15, ശനിയാഴ്ച) അവധി ഉൾപ്പെടെയാണിത്. എന്നാൽ ഈ തീയതികൾ ചന്ദ്രദർശനത്തിനെ ആശ്രയിച്ചായിരിക്കും കണക്കാക്കപ്പെടുക.
ഈ വർഷം യുഎഇ നിവാസികൾക്ക് പൊതു അവധി ദിവസങ്ങളായി കുറഞ്ഞത് 13 ദിവസമാണ് ലഭിക്കുക. ഏഴ് ഔദ്യോഗിക അവധി ദിവസങ്ങളിൽ നാലെണ്ണം ഈ വർഷം യുഎഇ നിവാസികൾക്ക് വാരാന്ത്യങ്ങളോടൊപ്പം ലഭിക്കും. 2024-ലെ പുതുവർഷവും ഇസ്ലാമിക ഉത്സവമായ ഈദ് അൽ ഫിത്തറും പ്രമാണിച്ച് നീണ്ട അവധി ലഭിക്കും.
ഈദ് അൽ അദ്ഹ (ജൂൺ), ഇസ്ലാമിക പുതുവത്സരം (ജൂലൈ), മുഹമ്മദ് നബി ജന്മദിനം (സെപ്റ്റംബർ), യുഎഇ ദേശീയ ദിനം (ഡിസംബർ) എന്നിവയാണ് ഈ വർഷത്തെ പ്രധാനപ്പെട്ട അവധി ദിവസങ്ങൾ.
