ചെറിയ പെരുന്നാളിന് മുന്നോടിയായി അബുദാബി ഖലീഫ സിറ്റിയിൽ പുതിയ പാർക്കുകൾ തുറക്കും. പുതിയതായി 21 പാർക്കുകളാണ് തുറക്കുകയെന്ന് അബുദാബി ഡിപ്പാർട്മെന്റ് ഓഫ് മുനിസിപ്പാലിറ്റീസ് ആന്റ് ട്രാൻസ്‌പോർട്ട് അധികൃതർ അറിയിച്ചു.
ജനങ്ങളുടെ ആരോഗ്യകരമായ ജീവിതശൈലി പ്രോത്സാഹിപ്പിക്കുന്നതിന്റെ ഭാഗമായാണ് പുതിയ പാർക്കുകൾ ആരംഭിക്കാനുള്ള തീരുമാനം. കുട്ടികൾക്കുള്ള കളിസ്ഥലങ്ങൾ, സന്ദർശകർക്കുള്ള ഇരിപ്പിടങ്ങൾ, പ്രിയപ്പെട്ടവരോടൊപ്പം ഒത്തുചേരാനുള്ള ഇടങ്ങൾ, ബാർബിക്യൂ ചെയ്യുന്നതിനുള്ള സൗകര്യങ്ങൾ, വളർത്ത് മൃഗങ്ങൾക്കുള്ള പ്രത്യേക സ്ഥലങ്ങൾ, വ്യായാമങ്ങൾ ചെയ്യുന്നതിനുള്ള സൗകര്യം തുടങ്ങിയവ ഉൾപ്പെടുത്തിയാണ് ഈ പാർക്കുകൾ നിർമ്മിച്ചിരിക്കുന്നത്.
ജനങ്ങളുടെ കായിക വിനോദങ്ങൾക്കായി വോളിബോൾ, ക്രിക്കറ്റ്, ബാഡ്മിന്റൺ തുടങ്ങിയവ കളിക്കുന്നതിനായുള്ള പ്രത്യേക സൗകര്യവും ഒരുക്കിയിട്ടുണ്ട്. ചെറിയ പെരുന്നാളിന് പ്രിയപ്പെട്ടവരോടൊപ്പം സമയം ചിലവഴിക്കാനുള്ള സൗകര്യമൊരുക്കുന്നതിനായാണ് ഈദി അവധി ദിനത്തിൽ തന്നെ പാർക്കുകൾ തുറക്കുന്നത്.
