കുവൈത്തിൽ തൊഴിലാളികളുടെ എണ്ണത്തിൽ വൻ വർധനവ്. കഴിഞ്ഞ വർഷവുമായി താരതമ്യം ചെയ്യുമ്പോൾ തൊഴിലാളികളുടെ എണ്ണത്തിൽ 2.5 ശതമാനം വർധനവാണ് രേഖപ്പെടുത്തിയിരിക്കുന്നത്. സെൻട്രൽ സ്റ്റാറ്റിസ്റ്റിക്കൽ ബ്യൂറോ പുറത്തിറക്കിയ റിപ്പോർട്ടിലാണ് ഇക്കാര്യം വ്യക്തമാക്കുന്നത്.
നിലവിൽ ഗാർഹിക തൊഴിലാളികളെ കൂടാതെ രാജ്യത്ത് 21.41 ലക്ഷം തൊഴിലാളികളാണ് ഉള്ളത്. ഇതിൽ 30.2 ശതമാനം പേരും ഇന്ത്യക്കാരാണ്. 16.2 ശതമാനവുമായി ഈജിപ്തുകാർ രണ്ടാം സ്ഥാനത്തും 15.4 ശതമാനവുമായി കുവൈത്തികൾ മൂന്നാം സ്ഥാനത്തുമാണ്.
കുവൈത്തിലെ തൊഴിലാളികളിൽ 3.77 ലക്ഷം പേർ സർക്കാർ മേഖലയിലും 74,100 പേർ സ്വകാര്യ മേഖലയിലുമാണ് ജോലി ചെയ്യുന്നത്. പ്രവാസി തൊഴിലാളികളിൽ 26.9 ശതമാനവും ജോലി ചെയ്യുന്നത് ഗാർഹിക മേഖലയിലാണ്.
