മൊറോക്കോയിൽ 2,100-ലധികം ആളുകൾ കൊല്ലപ്പെട്ട ശക്തമായ ഭൂകമ്പത്തിന് ശേഷം ഞായറാഴ്ച രാത്രി യുഎഇയിലുടനീളമുള്ള ലാൻഡ്‌മാർക്കുകളിൽ പ്രകാശിച്ചത് മൊറോക്കൻ പതാക.
മൊറോക്കോയ്ക്കും ഭൂകമ്പത്തിൽ മരിച്ചവരുടെ കുടുംബങ്ങൾക്കും ഐക്യദാർഢ്യവുമായി യുഎഇ നിലകൊള്ളുന്നുവെന്നതിന്റെ സൂചനയായിരുന്നു. ഭൂകമ്പബാധിതർക്ക് പിന്തുണയുമായി അബുദാബിയിലെ അഡ്‌നോക് കെട്ടിടവും ദുബായിലെ ബുർജ് ഖലീഫയും മൊറോക്കോ പതാകയുടെ നിറത്തിൽ പ്രകാശിച്ചു.
യുഎഇ മീഡിയ ഓഫീസ് സോഷ്യൽ മീഡിയ പ്ലാറ്റ്‌ഫോമായ എക്‌സിൽ ഐക്കണിക് കെട്ടിടങ്ങളുടെ വീഡിയോ പങ്കിട്ടു. “എമിറേറ്റ്‌സിൽ നിന്ന്…ഞങ്ങളുടെ ഹൃദയങ്ങൾ മൊറോക്കോയ്ക്കും അതിലെ ജനങ്ങൾക്കും ഒപ്പമാണ് ” എന്നും കൂടി വീഡിയോയ്ക്കൊപ്പം കുറിച്ചു.
ഭൂകമ്പം റിപ്പോർട്ട് ചെയ്ത് മണിക്കൂറുകൾക്കുള്ളിൽ തന്നെ ദുരിതബാധിതർക്ക് നിർണായക ദുരിതാശ്വാസ സാമഗ്രികളും മറ്റ് തരത്തിലുള്ള പിന്തുണയും എത്തിക്കുന്നതിനായി ഒരു എയർ ബ്രിഡ്ജ് സ്ഥാപിക്കാൻ യുഎഇ പ്രസിഡന്റ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ നിർദ്ദേശം നൽകിയിരുന്നു.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, സഹായം നൽകാൻ ദുബായ് പോലീസിന് നിർദ്ദേശം നൽകി. രക്ഷപ്പെട്ടവരെ രക്ഷിക്കാൻ മൊറോക്കോയിലെ ടീമുകൾക്ക് വേഗത്തിൽ സഹായം നൽകണമെന്ന് ഷെയ്ഖ് മുഹമ്മദ് റെസ്ക്യൂ, ആംബുലൻസ് ടീമുകളോട് ആവശ്യപ്പെട്ടു. യുഎഇയിൽ താമസിക്കുന്ന ആയിരക്കണക്കിന് മൊറോക്കൻ പ്രവാസികൾക്ക് അവരുടെ കുടുംബങ്ങളുമായി ബന്ധപ്പെടാൻ സൗകര്യമൊരുക്കുന്നതിനായി ടെലികോം കമ്പനികളായ എത്തിസലാത്തും ഡുവും ശനിയാഴ്ച യുഎഇയിൽ നിന്ന് മൊറോക്കോയിലേക്ക് സൗജന്യ അൺലിമിറ്റഡ് കോളിംഗ് പ്രഖ്യാപിച്ചു.ടെന്റുകൾ, പുതപ്പുകൾ, ഭക്ഷണം, മെഡിക്കൽ സാമഗ്രികൾ, ശുചിത്വ കിറ്റുകൾ എന്നിവയുൾപ്പെടെ അവശ്യസാധനങ്ങളുടെ ഗണ്യമായ അളവിൽ നൽകിക്കൊണ്ട് എമിറേറ്റ്സ് റെഡ് ക്രസന്റ് ഒരു ദുരിതാശ്വാസ പരിപാടി നടപ്പിലാക്കാൻ തുടങ്ങി.
