എയർ ഏഷ്യയ്ക്ക് അഭിനന്ദനവുമായി നടൻ ഉണ്ണിമുകുന്ദൻ. എയർ ഏഷ്യയുടെ ബോർഡിംഗിന് സൈനികർക്ക് മുൻഗണന നൽകുന്ന ബോർഡിന്റെ ചിത്രം ഫേസ്ബുകിലൂടെ പങ്കുവെച്ചുകൊണ്ടാണ് താരം അഭിനന്ദനവുമായി എത്തിയത്. എയർ ഏഷ്യയുടെ ഈ തീരുമാനം പ്രശസനീയമാണെന്ന് ഉണ്ണിമുകുന്ദൻ ഫേസ്ബുകിൽ കുറിച്ചു. ഗംഭീരം എയർ ഏഷ്യ, ഇത് കണ്ടതിൽ വളരെ സന്തോഷം എന്നാണ് താരത്തിന്റെ കുറിപ്പ്.
അതേസമയം നിരവധി പേരാണ് ഈ പോസ്റ്റിനു താഴെ കമന്റുകളുമായി എത്തിയത്. സൈനികർ കൊള്ളുന്ന വെയിലാണ് രാജ്യത്തെ ഓരോരുത്തരുടെയും തണൽ. പരിഗണനകൾ അർഹമായിടത്ത് നൽകുന്നതിലൂടെ സ്വയം ബഹുമാനിതരാകുന്നു എന്നാണ് ഒരു കമന്റ്. കർഷകരെ കൂടി പരിഗണിക്കൂ എന്ന് മറ്റൊരാൾ കമന്റ് ചെയ്തിട്ടുണ്ട്. മുൻപ് സായുധ സേനാംഗങ്ങൾക്ക് അടിസ്ഥാന നിരക്കുകളില്ലാതെ 50,000 സീറ്റുകൾ എയർ ഏഷ്യ വാഗ്ദാനം ചെയ്തിരുന്നു.
