നിലവിലെ യുഎഇ വീസയിലുള്ള വ്യക്തി വിവരങ്ങൾ, പാസ്പോർട്ട് വിവരങ്ങൾ, ജോലി, ദേശീയത എന്നിവയിൽ ഓൺലൈനായി മാറ്റം വരുത്താൻ സൗകര്യമേർപ്പെടുത്തി. മാറ്റം വരുത്തിക്കഴിഞ്ഞാൽ അത് ഉപയോഗിച്ച് എമിറേറ്റ്സ് ഐഡി പുതുക്കാനുള്ള അപേക്ഷ സൈറ്റിൽ വരും.
ഫെഡറൽ അതോറിറ്റി ഓഫ് ഐഡന്റിറ്റി, സിറ്റിസൻഷിപ്പ്, കസ്റ്റംസ്, പോർട്ട് സെക്യൂരിറ്റി (ഐസിപി) ആണ് ഈ സേവനം ഓൺലൈനിലൂടെ നൽകുന്നത്. വെബ്സൈറ്റായ www.icp.gov.ae അല്ലെങ്കിൽ UAEICP സ്മാർട് ആപിലോ വിസയിൽ തിരുത്തൽ വരുത്താം.
അപേക്ഷകന്റെ കളർ ഫോട്ടോ, പാസ്പോർട്ട് കോപ്പി, വിവരങ്ങളിൽ മാറ്റം വരുത്തുന്നതിന് വേണ്ടി സ്പോൺസർ ഒപ്പിട്ടു നൽകിയ അപേക്ഷ, എമിറേറ്റ്സ് ഐഡിയുടെ പകർപ്പ് എന്നിവയാണ് തിരുത്തലിന് ആവശ്യമുള്ള രേഖകൾ. 200 ദിർഹമാണ് ഫീസായി ഈടാക്കുക. ഏതെങ്കിലും സാഹചര്യത്തിൽ അപേക്ഷ നിരസിച്ചാൽ പണം തിരികെ ലഭിക്കുകയും ചെയ്യും.
