സുഡാൻ അഭയാർത്ഥികൾക്ക് വീണ്ടും സഹായമെത്തിച്ച് യുഎഇ. സംഘർഷം കാരണം നാടുവിട്ട സുഡാനി അഭയാർത്ഥികൾക്ക് ഭക്ഷണവുമായി യുഎഇ വിമാനം ഛാദിലെത്തി. സംഘർഷത്തേത്തുടർന്ന് നിരവധി സുഡാനികളാണ് അയൽരാജ്യമായ ഛാദിൽ അഭയംതേടിയിരിക്കുന്നത്. ഇവരെ സഹായിക്കുന്നതിനായാണ് ഭക്ഷണപ്പൊതികളുമായി യുഎഇ വിമാനമെത്തിയത്.
വിദേശകാര്യ മന്ത്രാലയവുമായി സഹകരിച്ച് എമിറേറ്റ്സ് റെഡ്ക്രസന്റ്, സായിദ് ബിൻ സുൽത്താൻ അൽ നഹ്യാൻ ചാരിറ്റബിൾ ആൻ്റ് ഹ്യുമാനിറ്റേറിയൻ ഫൗണ്ടേഷൻ, ഖലീഫ ബിൻ സായിദ് അൽ നഹ്യാൻ ഫൗണ്ടേഷൻ എന്നിവയുടെ സംയുക്താഭിമുഖ്യത്തിലാണ് സുഡാൻ അഭയാർത്ഥികൾക്ക് സഹായമെത്തിച്ചത്.
ദുരിതമനുഭവിക്കുന്ന ജനങ്ങളെ സഹായിക്കണമെന്ന യുഎഇ ഭരണാധികാരികളുടെ നിർദേശപ്രകാരമാണ് പദ്ധതികൾ നടപ്പാക്കുന്നതെന്ന് എമിറേറ്റ്സ് റെഡ്ക്രസന്റ് പ്രതിനിധി സംഘം തലവൻ ഡോ. അഹ്മദ് ഉബൈദ് അൽ ദാഹിരി പറഞ്ഞു.
