യുഎഇ ദേശീയദിന ആഘോഷ പരിപാടികളുടെ ടിക്കറ്റ് വില്‍പന ആരംഭിച്ചു. അബുദാബി നാഷണല്‍ എക്‌സിബിഷന്‍ സെന്ററില്‍ ഡിസംബര്‍ 2ന് തുടങ്ങുന്ന ആഘോഷം 11 വരെ തുടരും. ദിവസേന വൈകിട്ട് 6ന് തുടങ്ങുന്ന പരിപാടിക്ക് 200 ദിര്‍ഹമാണ് ടിക്കറ്റ് നിരക്ക്. 3 വയസ്സിനു താഴെയുള്ളവര്‍ക്കു പ്രവശനം സൗജന്യമാണ്.
കോവിഡ് നിയന്ത്രണങ്ങളെല്ലാം പിന്‍വലിച്ചതിനാല്‍ വിപുലമായ ആഘോഷ പരിപാടികളാണ് ഈ വര്‍ഷം സംഘടിപ്പിച്ചിരിക്കുന്നത്. യു.എ.ഇ ദേശീയ ദിനത്തോട് അനുബന്ധിച്ച് നീണ്ട വാരാന്ത്യ അവധിയും ലഭ്യമാകും. ഡിസംബർ ഒന്ന് മുതൽ ഡിസംബർ നാല് വരെയാണ് അവധിയാണ് ലഭ്യമാക്കുക. ഇതും പ്രയോജനപ്പെടുത്താനുളള നീക്കത്തിലാണ് യുഎഇയിലെ താമസക്കാര്‍.
ദേശീയ ദിനത്തിന് ശേഷം സ്കൂൾ ശൈത്യകാല അവധിയും ആരംഭിക്കും. ഡിസംബർ 11 മുതല്‍ ജനുവരി രണ്ട് വരെയാണ് സ്‌കൂളുകൾക്ക് ശൈത്യകാല അവധി. സ്കൂൾ അവധികൂടി കണക്കിലെടുത്ത് ആഘോഷങ്ങളിലേക്കും യാത്രകളിലേക്കും പോകുന്നത് നിരവധി ആ‍ളുകളാണ്. അതേസമയം അവധി ദിനങ്ങളോട് അനുബന്ധിച്ച് തിരക്കേറുന്നതിനാല്‍ വിമാന ടിക്കറ്റ് നിരക്കുകൾക്ക് നിരക്കുയരുമെന്ന് ട്രാവല്‍ ഏജന്‍സികൾ പറയുന്നു.
