കഴിഞ്ഞ വർഷം യുഎഇയ്ക്ക് ചരിത്രനേട്ടം സമ്മാനിച്ച യുഎഇ ബഹിരാകാശ സഞ്ചാരിയാണ് ഡോ. സുൽത്താൻ അൽ നെയാദി. ബഹിരാകാശനിലയത്തിലായിരുന്ന ദിവസങ്ങളിൽ ഒരുപാട് വിശേഷങ്ങളാണ് അദ്ദേഹം സോഷ്യൽ മീഡിയ പോസ്റ്റുകൾ വഴി പങ്കുവെച്ചത്. ബഹിരാകാശ നിലയത്തിൽ നിന്നുള്ള കൗതുകകരവും വളരെ വിജ്ഞാനപ്രദവുമായ കാര്യങ്ങൾ അദ്ദേഹം പങ്കുവെച്ചിരുന്നു.
ഈ വിശേഷങ്ങളെല്ലാം ചേർന്ന് ഡോ. സുൽത്താൻ അൽ നെയാദിയുടെ ബഹിരാകാശ ഡയറി എമിറേറ്റ്സ് ലിറ്ററേച്ചർ ഫെസ്റ്റിവലിൽ പുറത്തിറക്കും. വരാനിരിക്കുന്ന എമിറേറ്റ്സ് എയർലൈൻ ഫെസ്റ്റിവൽ ഓഫ് ലിറ്ററേച്ചറിൽ ഡോ അൽ നെയാദിയുടെ ആരാധകർക്ക് അദ്ദേഹത്തിന്റെ ബഹിരാകാശ സാഹസികതയെക്കുറിച്ച് കേൾക്കാനും പുസ്തകത്തിന്റെ പകർപ്പുകൾ വാങ്ങാനും അവസരം ലഭിക്കും.
ജനുവരി 31 മുതൽ ഫെബ്രുവരി 6 വരെയാണ് എമിറേറ്റ്സ് ലിറ്റ്‌ഫെസ്റ്റ് നടക്കുക. ഫെസ്റ്റിൽ പുറത്തിറക്കുന്ന പുസ്തകങ്ങളിലൊന്നാണ് അടുത്തിടെ നിയമിതനായ യുവജന മന്ത്രിയുടെ ഫോട്ടോ ജേണലെന്ന് എമിറേറ്റ്സ് ലിറ്ററേച്ചർ ഫൗണ്ടേഷന്റെ സിഇഒയും എമിറേറ്റ്സ് എയർലൈൻ ഫെസ്റ്റിവൽ ഓഫ് ലിറ്ററേച്ചറിന്റെ ഡയറക്ടറും മാനേജുമായ അഹ്‌ലം ബൂലൂക്കിയാണ് അറിയിച്ചത്.
