യുഎഇയിൽ പൊതുമാപ്പ് ആരംഭിച്ച സാഹചര്യത്തിൽ വിവിധ എമിറേറ്റുകളിലെ സേവന കേന്ദ്രങ്ങളിൽ വൻ ജനത്തിരക്കാണ് അനുഭവപ്പെടുന്നത്. നിരവധി പേർക്ക് ഇതിനോടകം എക്സിറ്റ് പെർമിറ്റുകൾ ലഭിച്ചുകഴിഞ്ഞു. ദുബായിലെ ആമർ സെൻ്ററുകൾ മുഖേന ലഭിച്ച അപേക്ഷകളിൽ 27,173 പേർക്കാണ് ഇതിനോടകം പൊതുമാപ്പ് ലഭിച്ചത്.
പൊതുമാപ്പ് ആരംഭിച്ച് 24 ദിവസം പിന്നിടുമ്പോൾ ദുബായിൽ 19,772 അപേക്ഷകർ താമസം നിയമവിധേയമാക്കിയപ്പോൾ 7,401 പേർ പിഴ ഒഴിവാക്കി രാജ്യം വിടാനുള്ള എക്സിറ്റ് പെർമിറ്റും നേടിക്കഴിഞ്ഞു. ജനറൽ ഡയറക്‌ടറേറ്റ് ഓഫ് റെസിഡൻസി ആന്റ് ഫോറിനേഴ്സ് അഫയേഴ്സ് (ജിഡിആർഎഫ്‌എ) അധികൃതരാണ് ഇക്കാര്യം വ്യക്തമാക്കിയത്.
എക്സിറ്റ് പാസ് ലഭിച്ച് 14 ദിവസത്തിനുള്ളിൽ രാജ്യം വിടണമെന്നായിരുന്നു ഇതുവരെയുള്ള നിബന്ധന. എന്നാൽ എക്സിറ്റ് പെർമിറ്റ് ലഭിച്ചവർ ഒക്ടോബർ 31നുള്ളിൽ രാജ്യം വിട്ടാൽ മതിയെന്ന് ഇന്നലെ അധികൃതർ വ്യക്തമാക്കിയിരുന്നു.
അതേസമയം, സെപ്റ്റംബർ ഒന്നിന് ശേഷം വിസാ കാലാവധി കഴിഞ്ഞവർ, ഒളിച്ചോടിയവർ, ജിസിസി രാജ്യങ്ങളിൽ നിന്ന് നാടുകടത്തപ്പെട്ടവർ എന്നിവർക്ക് പൊതുമാപ്പ് ആനുകൂല്യം ലഭിക്കില്ല. നിയമവിരുദ്ധമായി രാജ്യത്ത് താമസിക്കുന്നവർ പൊതുമാപ്പ് പ്രയോജനപ്പെടുത്തണമെന്നും നിയമാനുസൃതമായി രാജ്യത്ത് തുടരുകയോ പിഴ ഒഴിവാക്കി നാട്ടിലേയ്ക്ക് സുരക്ഷിതരായി മടങ്ങുകയോ ചെയ്യണമെന്നും അധികൃതർ കൂട്ടിച്ചേർത്തു.
