ബ്രിജ് ഭൂഷൺ സിംഗിനെതിരെ ലൈംഗീകാരോപണം ഉന്നയിച്ച് സമരം ചെയ്യുന്ന ഗുസ്തി താരങ്ങൾക്ക് പിന്തുണയുമായി നടൻ ടോവിനോ തോമസ്. ഇൻസ്റ്റാഗ്രാം പോസ്റ്റിലൂടെയാണ് ടൊവിനോ നിലപാട് വ്യക്തമാക്കിയത്. അന്താരാഷ്ട്ര കായിക വേദികളിൽ രാജ്യത്തിന്റെ യശസ്സ് ഉയർത്തി പിടിച്ചവരാണ് ഓരോ ഗുസ്തി താരങ്ങളും. ഒരു ജനതയുടെ മുഴുവൻ പ്രതീക്ഷകൾക്ക് വിജയത്തിന്റെ നിറം നൽകിയവരാണ് അവർ. രാജ്യത്തെ ഏതൊരു സാധാരണക്കാരനും അർഹിക്കുന്ന നീതി അവർക്ക് ലഭിക്കാതെ പോകരുത്. എതിർപക്ഷത്ത് നിൽക്കുന്നവർ ശക്തരായത് കൊണ്ട് അവർ ഒരിക്കലും തഴയപ്പെട്ടു കൂടാ എന്ന് ടൊവിനൊ ഇൻസ്റ്റാഗ്രാം പോസ്റ്റിൽ കുറിച്ചു.
ടോവിനോ ഇൻസ്റ്റാഗ്രാമിൽ പങ്കുവച്ച പോസ്റ്റിന്റെ പൂർണ്ണ രൂപം
അന്താരാഷ്ട്ര കായിക വേദികളിൽ ഇന്ത്യയുടെ യശസ്സ് ഉയർത്തി പിടിച്ചവരാണ് ഗുസ്തി താരങ്ങൾ. ഒരു ജനതയുടെ മുഴുവൻ പ്രതീക്ഷകൾക്ക് വിജയത്തിന്റെ നിറം നൽകിയവർ. ആ പരിഗണന പോലും വേണ്ട, പക്ഷേ രാജ്യത്തെ ഏതൊരു സാധാരണക്കാരനും അർഹിക്കുന്ന നീതിയെങ്കിലും ഇവർക്ക് ലഭിക്കാതെ പോവരുത്. എതിർപക്ഷത്ത് നിൽക്കുന്നവർ ശക്തരാണ് എന്നത്കൊണ്ട് മാത്രം ഇവർ ഒരിക്കലും തഴയപ്പെട്ടു കൂടാ.
അവർക്ക് പറയാനുള്ളത് കേൾക്കുകയും അവരുടെ ആവശ്യങ്ങൾ പരിഗണിക്കുകയും ചെയ്യണം. അവരുടെ നേട്ടങ്ങളും അംഗീകാരങ്ങളും മാറ്റിവെച്ചാൽ പോലും ഈ രാജ്യത്തെ ഓരോ പൗരനും അർഹിക്കുന്ന ഒരു നീതിയുണ്ട്. ആ നീതി വൈകരുത്. ഒരിക്കലും നിഷേധിക്കുകയും ചെയ്യരുത്.
അതേസമയം ഗുസ്തി താരങ്ങളുടെ സമരത്തില്‍ ഇടപെടലുമായി അന്താരാഷ്ട്ര ഒളിമ്പിക് കമ്മിറ്റിയും രംഗത്തെത്തിയിട്ടുണ്ട്. താരങ്ങളോടുള്ള ഇത്തരം സമീപനം അസ്വസ്ഥത ഉണ്ടാക്കുന്നു. ഈ സംഭവത്തിൽ പക്ഷപാതരഹിതമായ അന്വേഷണം വേണമെന്നും ഐഒസി ആവശ്യപ്പെട്ടു. ഗുസ്തി താരങ്ങളുമായി അന്താരാഷ്ട്ര ഒളിമ്പിക് കമ്മറ്റി ഉടൻ ചർച്ച നടത്തുമെന്ന് ഔദ്യോഗിക വൃത്തങ്ങൾ അറിയിച്ചു.
