ഏഷ്യൻ കപ്പ് ഫുട്ബോൾ മത്സരങ്ങൾക്ക് മുന്നോടിയായി പരിശീലനം ആരംഭിച്ച് യുഎഇ ടീം. 2024 ജനുവരി 12 മുതൽ ഫെബ്രുവരി 10 വരെ ഖത്തറിലാണ് ഏഷ്യൻ കപ്പ് ഫുട്ബോൾ മത്സരം സംഘടിപ്പിക്കപ്പെടുക. ഇതിന് മുന്നോടിയായാണ് യുഎഇ താരങ്ങൾ പരിശീലനം ആരംഭിച്ചത്. ഓസ്ട്രിയയിലെ ക്യാമ്പിലാണ് ടീം പരിശീലനത്തിന്റെ തുടക്കം കുറിച്ചിരിക്കുന്നത്.
പൗലോ ബെന്റോയാണ് ടീമിന്റെ കോച്ച്. ദക്ഷിണ കൊറിയൻ കോച്ചായിരുന്ന പൗലോ ആഴ്ചകൾക്ക് മുമ്പാണ് യുഎഇ ടീമിന്റെ കോച്ചായെത്തിയത്. കോച്ചിനൊപ്പം പരിശീലനത്തിലേർപ്പെട്ടിരിക്കുന്ന ചിത്രം പങ്കുവെച്ചാണ് താരങ്ങൾ ഇക്കാര്യങ്ങൾ വ്യക്തമാക്കിയത്. ഏഷ്യൻ കപ്പിൽ ജനുവരി 14ന് ഹോങ്കോങ്ങുമായാണ് യുഎഇയുടെ ആദ്യ മത്സരം നടക്കുക. അടുത്ത വർഷം നവംബറിൽ ആരംഭിക്കുന്ന ലോകകപ്പ് യോഗ്യത മത്സരങ്ങളെയും
വളരെ പ്രതീക്ഷയോടെയാണ് ടീം നോക്കിക്കാണുന്നത്.
