ഷാർജ പോലീസിൽ തൊഴിലവസരമുണ്ടെന്ന രീതിയിൽ പ്രചരിക്കുന്ന വാർത്ത വ്യാജമാണെന്ന് അധികൃതർ. എല്ലാ രാജ്യങ്ങളിൽ നിന്നുള്ളവർക്കും തൊഴിലവസരങ്ങൾ ഉണ്ടെന്ന രീതിയിലാണ് സമൂഹമാധ്യമങ്ങളിലൂടെ വാർത്തകളും പരസ്യങ്ങളും പ്രചരിക്കുന്നതെന്നും ഇത് തെറ്റായ വാർത്തയാണെന്നും വ്യക്തമാക്കിയിരിക്കുകയാണ് ഷാർജ പോലീസ് ജനറൽ കമാൻഡ്.
ഷാർജ പൊലീസിലെ തൊഴിലവസരങ്ങൾ ഷാർജ പോലീസ് ജനറൽ കമാൻഡിന്റെ ഔദ്യോഗിക വെബ്സൈറ്റ്, സോഷ്യൽ മീഡിയ അക്കൗണ്ടുകൾ തുടങ്ങിയവയിലൂടെ മാത്രമാണ് പ്രസിദ്ധീകരിക്കുന്നത്. അതിനാൽ മറ്റു വെബ്സൈറ്റുകളിലും, സാമൂഹിക മാധ്യമങ്ങളിലും വരുന്ന ഇത്തരം അറിയിപ്പുകളും വാർത്തകളും വിശ്വസിക്കരുതെന്നും പോലീസ് പൊതുജനങ്ങളോട് നിർദേശിച്ചു. ഇത്തരം വ്യാജ പ്രചാരണങ്ങൾ നടത്തുന്നവർക്കെതിരെ നടപടി സ്വീകരിക്കുമെന്നും പൊലീസ് പറഞ്ഞു.
