താനൂർ ബോട്ടപകടത്തിൽ മുഖ്യമന്ത്രി പിണറായി വിജയൻ ജുഡീഷ്യൽ അന്വേഷണം പ്രഖ്യാപിച്ചു. പൊലീസ് അന്വേഷണത്തിന് പ്രത്യേക സംഘത്തെയും ചുമതലപ്പെടുത്തിയെന്ന് മുഖ്യമന്ത്രി അറിയിച്ചു. കൂടാതെ മരണപ്പെട്ട ഓരോരുത്തരുടെയും കുടുംബത്തിന് 10 ലക്ഷം രൂപ വീതം ധനസഹായം നൽകുമെന്നും മുഖ്യമന്ത്രി കൂട്ടിച്ചേർത്തു. ചികിത്സയിൽ കഴിയുന്നവരുടെ ചെലവ് സർക്കാർ വഹിക്കുമെന്നും പരപ്പനങ്ങാടിയിലെ ഖബർസ്ഥാന്‍ സന്ദർശിച്ച ശേഷം മുഖ്യമന്ത്രി പറഞ്ഞു.
അതേസമയം താനൂരിലെ ബോട്ടപകടമുണ്ടാകാൻ കാരണമായാത് നിയമലംഘനമാണെങ്കിൽ അതിനെതിരെ നടപടിയുണ്ടാകുമെന്ന് എൽഡിഎഫ് കൺവീനര്‍ ഇപി ജയരാജൻ പറഞ്ഞു. താനൂർ ബോട്ടപകടത്തിൽ മിസ്സിങ്ങ് കേസുകളുമായി ബന്ധപ്പെട്ട് പരാതികൾ ഒന്നും ഇതുവരെ ലഭിച്ചിട്ടില്ലെന്ന് ഫയർഫോഴ്സ് മേധാവി ബിസന്ധ്യ അറിയിച്ചു. ഫയർഫോഴ്സിന്‍റെ അഞ്ച് ടീമുകൾ സ്ഥലത്ത് ഇപ്പോഴും തെരച്ചിൽ നടത്തുകയാണ്. പുഴയുടെ അടിയിൽ ചെളി അടിഞ്ഞിരിക്കുന്നതിനാൽ തെരച്ചിൽ ദുഷ്കരമാണെന്നും സന്ധ്യ കൂട്ടിച്ചേർത്തു.
