യുഎഇയിൽ താപനില ദിനംപ്രതി വർധിക്കുകയാണ്. ചൂട് സഹിക്കാൻ സാധിക്കാത്ത അവസ്ഥയിലാണ് യുഎഇ നിവാസികൾ. നാഷണൽ സെൻ്റർ ഓഫ് മെറ്റീരിയോളജി അധികൃതരുടെ റിപ്പോർട്ട് പ്രകാരം രാജ്യത്തെ താപനില 50 ഡിഗ്രി സെൽഷ്യസ് കവിഞ്ഞു. ഇന്നലെ സ്വീഹാനിലാണ് താപനില 50.8 ഡിഗ്രി സെൽഷ്യസ് രേഖപ്പെടുത്തിയത്.
പ്രാദേശിക സമയം ഉച്ചകഴിഞ്ഞ് 3.45-നാണ് സ്വീഹാനിൽ ഉയർന്ന താപനില രേഖപ്പെടുത്തിയത്. തുടർച്ചയായ രണ്ടാം ദിവസമാണ് യുഎഇയിൽ ചൂട് 50 ഡിഗ്രി കടക്കുന്നത്. തിങ്കളാഴ്ച രാജ്യത്ത് രേഖപ്പെടുത്തിയ ഉയർന്ന താപനില 50.7 ഡിഗ്രി സെൽഷ്യസായിരുന്നു. രാജ്യത്ത് എല്ലായിടത്തും ഉയർന്ന ചൂട് രേഖപ്പെടുത്തുമ്പോഴും സെപ്റ്റംബർ വരെ ഇടയ്ക്കിടെ വേനൽമഴ പ്രതീക്ഷിക്കുന്നതിനാൽ ജനങ്ങൾക്ക് ആശ്വാസം ലഭിച്ചേക്കുമെന്നാണ് വിലയിരുത്തൽ.
താപനില വർദ്ധിക്കുന്നതിനാൽ ജനങ്ങൾക്ക് അധികൃതർ ജാഗ്രതാ നിർദേശം നൽകിയിട്ടുണ്ട്. സ്ട്രോക്ക്, ക്ഷീണം, നിർജലീകരണം എന്നിവ വർദ്ധിക്കുന്നതിനാൽ മുൻകരുതൽ നടപടികൾ സ്വീകരിക്കാൻ ഡോക്ടർമാർ ജനങ്ങളോട് ആവശ്യപ്പെട്ടു. ജലാംശം നിലനിർത്താനും നേരിട്ട് സൂര്യപ്രകാശം ഏൽക്കാതിരിക്കാനും മധ്യാഹ്നസമയത്ത് പുറത്ത് പോകുന്നത് പരിമിതപ്പെടുത്തണമെന്നും ആവശ്യമില്ലെങ്കിലും ഇടയ്ക്കിടെ വെള്ളം കുടിക്കണമെന്നും നിർദേശിച്ചു.
