ഷിരൂരിലെ മണ്ണിടിച്ചിലിൽ കാണാതായ അർജുനായുള്ള തിരച്ചിൽ ഇന്ന് വീണ്ടും ആരംഭിച്ചു. തിരച്ചിലിന് വേണ്ടിയുള്ള ഡ്രഡ്‌ജർ ഇന്നലെ ഗോവയിൽ നിന്നും ഗംഗാവലി പുഴയിലെത്തിച്ചിരുന്നു. നാവികസേനയുടെ ഡൈവിങ് സംഘം എത്തുന്നതോടെ പുഴയിലിറങ്ങിയുള്ള തിരച്ചിൽ ആരംഭിക്കും.
ഗംഗാവലി പുഴയുടെ അടിത്തട്ടിൽ ഇപ്പോഴും പാറക്കെട്ടുകളും മൺകൂനകളുമുണ്ട്. അതുകൊണ്ട് തന്നെ ഒരു തോണിയിൽ വലിയ ആഴത്തിൽ പരിശോധന നടത്തിയാണ് ഡ്രഡ്‌ജർ ഇറക്കുക. പരിശോധന നടത്താൻ നാല് മണിക്കൂറിനടുത്ത് സമയമാവശ്യമാണെന്നാണ് ഷിപ്പിങ് കമ്പനി അറിയിക്കുന്നത്. നേരത്തെ ലോഹഭാഗങ്ങൾ കണ്ടെത്തിയ ഭാഗത്താണ് ആദ്യഘട്ട പരിശോധന നടത്തുന്നത്.
ഇരുപത്തിയെട്ടര മീറ്റർ നീളവും എട്ട് മീറ്റർ വീതിയുമുള്ള മൂന്നടി വരെ വെള്ളത്തിന്റെ അടിത്തട്ടിൽ മണ്ണെടുക്കാൻ കഴിയുന്ന ഡ്രഡ്‌ജറാണ് ഗോവയിൽ നിന്നും ഇന്നലെ എത്തിച്ചത്. കാലാവസ്ഥ പ്രതികൂലമായതിനെ തുടർന്ന് ഓഗസ്റ്റ് 16നായിരുന്നു അർജുനായുള്ള തിരച്ചിൽ അവസാനിപ്പിച്ചത്. തുടന്ന് അർജുന്റെ മാതാപിതാക്കൾ കർണാടക മുഖ്യമന്ത്രി സിദ്ധരാമയ്യയെ നേരിട്ടുകണ്ട് തിരച്ചിൽ പുനരാരംഭിക്കണമെന്ന് അഭ്യർത്ഥിക്കുകയായിരുന്നു. ഇതിന്റെ അടിസ്ഥാനത്തിലാണ് തിരച്ചിൽ പുനരാരംഭിക്കാൻ സർക്കാർ തീരുമാനിച്ചത്.
