രക്ഷിതാക്കളുടെ ചെറിയ അശ്രദ്ധപോലും കുട്ടികളുടെ ജീവന് അപകടമായേക്കാം. വീടുകളിൽ കുട്ടികളുടെ സുരക്ഷ ഉറപ്പ് വരുത്താൻ രക്ഷിതാക്കൾക്ക് മാർഗനിർദേശം നൽകുകയാണ് സൗദി സിവിൽ ഡിഫൻസ് അധികൃതർ. വീടുകളിൽ പതിയിരിക്കുന്ന അപകടങ്ങളിൽ നിന്ന് കുട്ടികളുടെ സുരക്ഷ ഉറപ്പാക്കാനാണ് അധികൃതർ ഇതുവഴി ലക്ഷ്യമിടുന്നത്.
അപകടങ്ങൾക്കിടയാക്കുന്ന വസ്തുക്കൾ കുട്ടികൾക്ക് ലഭ്യമാകുന്ന രീതിയിൽ വീടുകളിൽ അലക്ഷ്യമായി വെക്കരുതെന്ന് അധികൃതർ ചൂണ്ടിക്കാട്ടി. തീപ്പിടുത്തതിന് ഇടയാക്കിയേക്കാവുന്ന സ്റ്റൗ, ഗ്യാസ് സിലിണ്ടർ, ഇലക്ട്രിക്കൽ ഉപകരണങ്ങൾ എന്നിവ കുട്ടികൾക്ക് ഉപയോഗിക്കാനാകുന്ന രീതിയിൽ വീടുകളിൽ സൂക്ഷിക്കരുത്. സ്വിച്ച് ബോർഡുകൾ, പ്ലഗുകൾ തുടങ്ങിയവ കുട്ടികൾക്ക് ലഭ്യമല്ലാതാക്കുകയും ഇലക്ട്രോണിക് ഉപകരണങ്ങൾ ഉപയോഗശേഷം ഓഫ് ചെയ്ത് സൂക്ഷിക്കുകയും ചെയ്യണം.
ഇലക്ട്രിക് വയറുകളിൽ നിന്നുള്ള അപകടം ഒഴിവാക്കുന്നതിനായി പവർ സോക്കറ്റുകൾ ശരിയായ വിധത്തിൽ അടച്ചിട്ടുണ്ടെന്ന് ഉറപ്പ് വരുത്തേണ്ടതാണ്. മൂർച്ചയേറിയ ഉപകരണങ്ങൾ, ശുചീകരണപ്രക്രിയയ്ക്കായി ഉപയോഗിക്കുന്നതുൾപ്പെടെയുള്ള കെമിക്കലുകൾ മുതലായവ കുട്ടികൾക്ക് എടുക്കാൻ കഴിയുന്ന രീതിയിൽ സൂക്ഷിക്കരുത്. കൂടാതെ സ്വിമ്മിങ്ങ് പൂളുകളിലും, അവയ്ക്ക് അരികിലും മുതിർന്നവരുടെ സാന്നിധ്യത്തിൽ അല്ലാതെ കുട്ടികളെ നിർത്തരുതെന്നും, വീടുകൾക്ക് പുറത്ത് കുട്ടികളെ ഒറ്റയ്ക്ക് നിർത്തരുതെന്നും അധികൃതർ നിർദേശിച്ചു.
