സൗദി അറേബ്യയുടെ എണ്ണ ഇതര ഉൽപാദനമേഖല അതിശക്തമാണെന്നും ജിഡിപി 6.1 ശതമാനത്തിലെത്തിയതായും ധനമന്ത്രി മുഹമ്മദ് അൽ ജദ്ആൻ. റിയാദിൽ നടന്നുവരുന്ന ഫ്യൂച്ചർ ഇൻവെസ്റ്റ്മെന്റ് ഇനീഷ്യേറ്റീവ് കോൺഫറൻസിൽ പങ്കെടുത്ത് സംസാരിക്കുകയായിരുന്നു അദ്ദേഹം. വിഷൻ 2030 പദ്ധതിയുടെ പ്രധാന ലക്ഷ്യങ്ങളിലൊന്നാണ് ആഭ്യന്തര ഉൽപാദനത്തിലെ ജിഡിപി വളർച്ചയെന്ന് അദ്ദേഹം പറഞ്ഞു.
സൗദി അറേബ്യ എണ്ണ ഇതര മൊത്ത ആഭ്യന്തര ഉൽപ്പാദനത്തിൽ ശ്രദ്ധ കേന്ദ്രീകരിച്ചുവരികയാണ്. ഈ മേഖലയിൽ ആരോഗ്യകരമായ വളർച്ചയാണ് രാജ്യം കൈവരിച്ചുകൊണ്ടിരിക്കുന്നത്. ഈ വർഷത്തിന്റെ മൂന്നാം പാദത്തിലാണ് ജിഡിപി ശതമാനം ഇത്രയും വർധിച്ചത്. അതിനാൽ വർഷാവസാനത്തോടെ ഇത് അധികരിക്കുമെന്നും ധനമന്ത്രി മുഹമ്മദ് അൽ ജദ്ആൻ വ്യക്തമാക്കി.
