ബ്രിക്സ് കൂട്ടായ്മയിലേക്ക് യുഎഇയ്ക്കും സൗദിയ്ക്കും ഉൾപ്പെടെ ആറ് പുതിയ രാജ്യങ്ങളെ കൂടി ക്ഷണിച്ചു. ജോഹന്നാസ്ബർഗിൽ നടക്കുന്ന ബ്രിക്സ് സമ്മേളനത്തിനിടെയാണ് പുതിയ രാജ്യങ്ങൾക്ക് ക്ഷണം പ്രഖ്യാപിച്ചത്. , ഈജിപ്ത്, ഇറാൻ, എത്യോപ്യ, അർജന്റീന, സൗദി അറേബ്യ, യുഎഇ എന്നീ രാജ്യങ്ങളെ ബ്രിക്സിലേക്ക് ക്ഷണിച്ചുവെന്ന് ദക്ഷിണാഫ്രിക്കൻ പ്രസിഡന്റ് സിറിൽ റാംപോസ അറിയിച്ചു. കൂടാതെ 2023 ജനുവരി ഒന്ന് മുതൽ പുതിയ രാജ്യങ്ങളുടെ മെമ്പർഷിപ്പിന് പ്രാബല്യമുണ്ടായിരിക്കും.
ബ്രിക്സിന്റെ വികസനത്തിനായി നയങ്ങളും യോഗ്യതയും പുതിയ അംഗങ്ങളെ ചേർക്കുന്നതിനുള്ള നടപടിക്രമങ്ങളും ചർച്ച ചെയ്തതിന് ശേഷമാണ് തീരുമാനമെടുത്തതെന്ന് റാംപോസ അറിയിച്ചു. ആദ്യഘട്ട വികസനമാണ് ഇപ്പോൾ നടക്കുക. അടുത്ത ഘട്ടം വികസനം വൈകാതെ ഉണ്ടാവുമെന്നും അദ്ദേഹം പറഞ്ഞു.
അതേസമയം ബ്രിക്സ് സമ്മേളനം വിജയകരമായി നടത്തിയതിന് പ്രധാനമന്ത്രി നരേന്ദ്ര മോദി റാംപോസയെ അഭിനന്ദനം അറിയിച്ചു. ബ്രിക്സിലേക്ക് കൂടുതൽ അംഗങ്ങളെത്തുന്നത് സംഘടനയുടെ ശക്തി വർധിപ്പിക്കുമെന്നും നരേന്ദ്ര മോദി കൂട്ടിച്ചേർത്തു . എന്നാൽ ബ്രിക്സിൽ പാകിസ്താനെ ഉൾപ്പെടുത്താനുള്ള ചൈനയുടെ നീക്കങ്ങൾക്ക്‌ വിജയം കണ്ടെത്താൻ സാധിച്ചില്ല.
