സമൂഹമാധ്യമങ്ങളിൽ വൈറലായ റിവ്യൂവർ സന്തോഷ് വർക്കിക്ക് നേരെ തിയറ്ററിൽ കയ്യേറ്റ ശ്രമം. ആറാട്ട് സിനിമയുടെ റിവ്യൂ പറഞ്ഞാണ് സന്തോഷ് വൈറലായത്. കൊച്ചി വനിത–വിനീത തിയറ്ററിലാണ് സംഭവം. ഒരുകൂട്ടം ആളുകൾ സന്തോഷിനെ കൂട്ടത്തോടെ മർദിക്കാൻ ശ്രമിക്കുകയായിരുന്നു. ജൂൺ രണ്ടിന് റിലീസ് ചെയ്ത ‘വിത്തിൻ സെക്കൻഡ്സ്’ എന്ന സിനിമയുടെ റിവ്യുവുമായി ബന്ധപ്പെട്ട തർക്കത്തെ തുടർന്നായിരുന്നു സംഘർഷം. സിനിമ മുഴുവൻ കാണാതെ മോശം അഭിപ്രായം പറഞ്ഞെന്നാരോപിച്ചായിരുന്നു സന്തോഷിന് നേരെ ആളുകൾ കയ്യേറ്റം നടത്തിയത്.
‘ആറാട്ടണ്ണൻ’ എന്നാണ് സമൂഹമാധ്യമങ്ങളിലും ചലച്ചിത്ര ആരാധക ഗ്രൂപ്പുകളിലും മറ്റും സന്തോഷ് അറിയപ്പെടുന്നത്. കയ്യേറ്റം നടത്തുന്നതിന്റെ വിഡിയോ സമൂഹമാധ്യമങ്ങളിൽ ഇതിനോടകം തന്നെ വൈറലായിട്ടുണ്ട്. ഇന്ദ്രന്‍സിനെ കേന്ദ്ര കഥാപാത്രമാക്കി വിജേഷ് പി. വിജയന്‍ സംവിധാനം ചെയ്ത ചിത്രമാണ് ‘വിത്തിൻ സെക്കൻഡ്സ്’. സുധീര്‍ കരമന, സിദ്ദീഖ്, തലൈവാസൽ വിജയ്, സുനിൽ സുഖദ, അലന്‍സിയര്‍, സന്തോഷ് കീഴാറ്റൂർ, സെബിന്‍ സാബു, നാരായണൻകുട്ടി, ഡോക്ടർ സംഗീത് ധർമരാജ, ബാജിയോ ജോര്‍ജ്, സാന്റിനോ മോഹന്‍, ജെ.പി. മണക്കാട്, തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. അനില്‍ പനച്ചുരാൻ എഴുതിയ വരികള്‍ക്ക് രഞ്ജിന്‍ രാജ് സംഗീത സംവിധാനം നിർവഹിക്കുന്നു. ഡോക്ടര്‍ സംഗീത് ധര്‍മ്മരാജന്‍, വിനയന്‍ പി. വിജയന്‍ എന്നിവര്‍ ചേര്‍ന്നാണ് ചിത്രത്തിന്റെ കഥയും തിരക്കഥയും സംഭാഷണവും നിർവഹിക്കുന്നത്.
