ശമ്പളകാര്യത്തിൽ വഴി മുട്ടി സർക്കാർ ജീവനക്കാർ. സംസ്ഥാന സർക്കാർ ജീവനക്കാർക്ക് ശമ്പളം നൽകാൻ ഇനിയും വൈകുമെന്നതാണ് ഇതിന് കാരണം. ശമ്പളം തിങ്കളാഴ്ചയോടെ മാത്രമേ ജീവനക്കാർക്ക് കിട്ടി തുടങ്ങുകയുള്ളു. ഇടിഎസ്ലി അക്കൗണ്ടിലെത്തിയ പണം ബാങ്ക് വഴി പിൻവലിക്കാൻ കഴിയാത്തതാണ് ഇതിന് കാരണം. മാത്രമല്ല, അക്കൗണ്ട് മരവിപ്പിച്ചത് പണമില്ലാത്ത പ്രതിസന്ധി മൂലമായിരുന്നു. ഈ സാഹചര്യത്തിൽ ട്രഷറിയിലേക്ക് പണമെത്തിക്കാൻ തിരക്കിട്ട നീക്കം നടത്തുന്നുണ്ട്. മാത്രമല്ല, ഓൺലൈൻ ഇടപാടും നടക്കുന്നില്ല. ആഭ്യന്തരം, റവന്യു, ട്രഷറി, ജിഎസ്ടി വകുപ്പുകളിലും സെക്രട്ടേറിയേറ്റിലുമായി ഏകദേശം 97000 ത്തോളം പേർക്കാണ് ആദ്യ ദിവസം ശമ്പളം കിട്ടേണ്ടിയിരുന്നത്.
പണമെത്തിക്കാൻ പൊതുമേഖലാ സ്ഥാപനങ്ങൾക്ക് അധികൃതർ നിർദ്ദേശം നൽകിയിട്ടുണ്ട്. ലാഭവിഹിതവും നീക്കിയിരിപ്പും ട്രഷറിയിൽ നിക്ഷേപിക്കണമെന്നും നിർദേശിച്ചിട്ടുണ്ട്. അതേസമയം ശമ്പളം വൈകുന്നതിനെതിരെ പ്രതിഷേധം കടുപ്പിച്ച് ജീവനക്കാർ രംഗത്ത് വന്നു. സർക്കാരിൻ്റെ കെടുകാര്യസ്ഥതയാണ് ശമ്പളം വൈകാൻ കാരണമെന്ന് സെക്രട്ടേറിയറ്റ് ആക്ഷൻ കൗൺസിൽ കുറ്റപ്പെടുത്തി. സംഭവത്തിൽ പ്രതിഷേധ പ്രകടനം നടത്താനും തീരുമാനിച്ചിട്ടുണ്ട്.
സംസ്ഥാന സർക്കാർ ജീവനക്കാരുടെ ശമ്പളം മുടങ്ങിയത് ധനപ്രതിസന്ധിയെ തുടർന്നെന്നാണ് വിവരം. എന്നാൽ സാങ്കേതിക പ്രശ്നം മൂലമാണ് ശമ്പളം വൈകുന്നതെന്ന് പറയുന്ന ട്രഷറി വകുപ്പും ധനവകുപ്പും കൂടുതൽ വിശദീകരണത്തിന് തയ്യാറായിട്ടില്ല. മാത്രമല്ല, ജീവനക്കാരുടെ എംപ്ലോയീസ് ട്രഷറി സേവിങ്സ് ബാങ്ക് അക്കൗണ്ടുകളിൽ ശമ്പളം പ്രതിഫലിക്കുന്നുണ്ടെങ്കിലും ബാങ്ക് വഴിയോ ഓൺലൈനായോ പണം പിൻവലിക്കാനും കഴിയുന്നില്ല. ശമ്പളം ക്രഡിറ്റ് ചെയ്തെന്ന് വരുത്തി വിമർശനം ഒഴിവാക്കാനുള്ള സർക്കാർ തന്ത്രമാണ് ഇതെന്നും ആരോപണം ഉയരുന്നുണ്ട്.
