ദുബായ് അൽഖൈൽ റോഡിൽ 2 പുതിയ പാലങ്ങൾ കൂടി തുറന്നു. അൽഖൈൽ റോഡ് വികസന പദ്ധതികളുടെ ഭാഗമായാണ് റോഡുകൾ വീതികൂട്ടുകയും കൂടുതൽ പാലങ്ങൾ പണിയുകയും ചെയ്യുന്നത്. മണിക്കൂറിൽ 8,000 വാഹനങ്ങൾക്ക് സഞ്ചരിക്കാൻ ശേഷിയുള്ളതാണ് ഇപ്പോൾ തുറന്നുകൊടുത്തിരിക്കുന്ന സബീൽ, അൽഖുസ്-1 പാലങ്ങൾ. ഇതോടെ പ്രദേശത്തേക്കുള്ള യാത്രാസമയം 30 ശതമാനം കുറയും.
സബീൽ പാലസ് സ്ട്രീറ്റിൽ നിന്നും ഊദ്മേത്ത സ്ട്രീറ്റിൽ നിന്നും അൽഖൈൽ റോഡിലേക്കുള്ള ആദ്യത്തെ പാലം 700 മീറ്റർ നീളത്തിലുള്ള 3 വരിപാതയാണ്. മണിക്കുറിൽ 4,800 വാഹനങ്ങൾക്ക് ഇതുവഴി സഞ്ചരിക്കാൻ സാധിക്കും. അൽമെയ്ദാൻ സ്ട്രീറ്റിൽ നിന്ന് അൽഖൈലിലേക്കുള്ള അൽഖൂസ്-1 പാലത്തിന് 650 മീറ്റർ നീളം വരും. 2 വരി പാതയിലൂടെ മണിക്കൂറിൽ 3,200 വാഹനങ്ങൾക്ക് കടന്നുപോകാൻ സാധിക്കും.
ഈ മേഖലയിലെ തിരക്ക് കുറയുന്നതോടെ ഇന്റർസെക്ഷനിലൂടെ മണിക്കൂറിൽ കടന്നുപോകാവുന്ന വാഹനങ്ങളുടെ എണ്ണം 19,600 ആയും ഉയരും.
