ദുബായിക്ക് പുതിയൊരു മുഖം സമ്മാനിച്ച മെട്രോ 15-ാം വാർഷികം ആഘോഷിക്കാനൊരുങ്ങുകയാണ്. 2009 സെപ്റ്റംബർ 9ന് ആരംഭിച്ച മെട്രോയുടെ വാർഷികാഘോഷം ഗംഭീരമാക്കാനുള്ള തയ്യാറെടുപ്പിലാണ് റോഡ്സ് ആന്റ് ട്രാൻസ്പോർട്ട് അതോറിറ്റി (ആർടിഎ). ഇതിന്റെ ഭാഗമായി യാത്രക്കാർക്ക് പ്രത്യേക ഓഫറുകളും ആർടിഎ ഒരുക്കിയിട്ടുണ്ട്.
വാർഷികാഘോഷത്തോട് അനുബന്ധിച്ച് സുവനീറായി പ്രത്യേക നോൽ കാർഡ് യാത്രക്കാരിലേയ്ക്കെത്തിക്കും. 2009നും 2023നും ഇടയിൽ സെപ്റ്റംബർ 9ന് ജനിച്ചവർക്കായി ദുബായ് ലെഗോ ലാൻഡിൽ അടുത്തമാസം 21ന് മെട്രോ ബേബീസ് എന്ന പേരിൽ പ്രത്യേക ആഘോഷം സംഘടിപ്പിക്കും. ഈ വർഷങ്ങളിൽ ജനിച്ച കുട്ടികളുടെ മാതാപിതാക്കൾക്ക് www.rta.ae എന്ന വെബ്സൈറ്റിൽ രജിസ്‌റ്റർ ചെയ്യാം.
ആഘോഷങ്ങളുടെ സ്പോൺസർമാരിൽ ഒരാളായ ഇഗ്ലു ഐസ്ക്രീം മെട്രോ ജന്മദിന സ്പെഷ്യൽ ഐസ്ക്രീം വിപണിയിൽ ഇറക്കും. ദുബായ് മെട്രോയുടെ രൂപത്തിൽ ഇറക്കുന്ന അയ്യായിരത്തോളം ഐസ്ക്രീമിലെ കമ്പുകളിൽ ചിലതിൽ പ്രത്യേക കോഡ് രേഖപ്പെടുത്തിയിട്ടുണ്ട്. ഈ കോഡ് ലഭിക്കുന്നവർക്ക് ആർടിഎ ഇറക്കുന്ന നോൽ ടെർഹാൾ ഡിസ്കൗണ്ട് കാർഡ് നേടാം.
വാർഷികാഘോഷത്തോട് അനുബന്ധിച്ച് എമിറേറ്റ്സ് പോസ്റ്റ് പ്രത്യേക സ്റ്റാംപ് ഇറക്കാനും തീരുമാനിച്ചു. അതോടൊപ്പം 21 മുതൽ 27 വരെ മെട്രോ സ്‌റ്റേഷനുകളിൽ പ്രത്യേക സംഗീത പരിപാടികളും ഒരുക്കിയിട്ടുണ്ട്.
