എല്ലാവരുടെയും സ്വപ്ന നഗരമായ ദുബായിലെ റോഡുകൾക്ക് നിങ്ങൾക്ക് ഇഷ്ടമുള്ള പേര് ഇടാൻ സാധിച്ചിരുന്നെങ്കിൽ എന്ന് ആഗ്രഹിച്ചിട്ടുണ്ടോ? എങ്കിൽ ആ ആഗ്രഹം സാധിച്ചുതരികയാണ് ദുബായ് മുനിസിപ്പാലിറ്റി. ഇനി നിങ്ങൾ നിർദേശിക്കുന്നതിൽ നിന്ന് തിരഞ്ഞെടുക്കുന്ന പേരുകളിലാകും ദുബായിലെ റോഡുകൾ അറിയപ്പെടുക.
നാടിൻ്റെ ചരിത്രം, നാഗരികത, സാഹിത്യം, പ്രകൃതി എന്നിവയുമായി ബന്ധപ്പെട്ട പേരുകൾ നിർദേശിക്കാനാണ് പൊതുജനങ്ങൾക്ക് അവസരം നൽകിയിരിക്കുന്നത്. ഇതിനായി ദുബായ് മുനിസിപ്പാലിറ്റിക്ക് കീഴിലെ റോഡ് നെയിമിങ് കമ്മിറ്റി ഒരു ഡിജിറ്റൽ പ്ലാറ്റ്ഫോം പുറത്തിറക്കിയിട്ടുണ്ട്. roadnsaming.ae എന്ന വെബ്സൈറ്റിലൂടെയാണ് ജനങ്ങൾക്ക് പേരുകൾ നിർദേശിക്കാൻ സാധിക്കുക. എമിറേറ്റിൽ പുതിയതായി നിർമ്മിക്കുന്ന റോഡുകൾക്കും തെരുവുകൾക്കുമാണ് തിരഞ്ഞെടുക്കപ്പെടുന്ന പേരുകൾ ഇടുന്നത്.
ഓരോ പ്രദേശത്തെ റോഡിനും നൽകാൻ കഴിയുന്ന പേരുകളെ പ്രത്യേകമായി തരംതിരിച്ചിട്ടുണ്ട്. കല, സംസ്കാരം, അറബി കവിതകൾ എന്നിവയുമായി ബന്ധപ്പെട്ട പേരുകൾക്കൊപ്പം അറബിക്, ഇസ്ലാമിക രൂപകല്പന, വാസ്തുവിദ്യ എന്നിവയുമായി ബന്ധപ്പെട്ട പേരുകളും ഇതിൽ ഉൾപ്പെടുന്നുണ്ട്. ചെടികൾ, പൂവുകൾ, പ്രകൃതി പ്രതിഭാസങ്ങൾ, കടൽ പക്ഷികൾ, കപ്പലുകൾ, നാവിക ഉപകരണങ്ങൾ, മത്സ്യബന്ധനം, കാറ്റ്, മഴ, പരിസ്ഥിതിക സുസ്ഥിരത എന്നിവയുമായി ബന്ധപ്പെട്ട പേരുകളും നിങ്ങൾക്ക് നിർദേശിക്കാം.
