റിയാദ് ഇന്റര്‍നാഷണല്‍ ഇന്ത്യന്‍ സ്കൂൾ മധ്യവേനലവധി കഴിഞ്ഞ് തുറക്കുന്നത് സെപ്റ്റംബർ 3 വരെ നീട്ടി. താപനില അതികഠിനമായി തുടരുന്നതിനാലാണ് സ്കൂൾ തുറക്കുന്നത് നീട്ടിവെച്ചത്. കെ.ജി മുതൽ 12-ാം ക്ലാസുവരെയുള്ള റഗുലർ ക്ലാസുകളാണ് സെപ്റ്റംബർ 3-ന് ആരംഭിക്കുക. ഒൻപത് മുതൽ 12 വരെയുള്ള ക്ലാസുകൾക്ക് ഇന്ന് (ഓഗസ്റ്റ് 21) മുതൽ 31 വരെ രാവിലെ 9 മണി മുതൽ ഉച്ചയ്ക്ക് ഒന്ന് വരെ ഓൺലൈൻ ക്ലാസുകൾ നടക്കും.
കെ.ജി മുതൽ എട്ടാം ക്ലാസ് വരെയുള്ളവർക്ക് 31 വരെ സ്കൂൾ അവധിയാണ്. കുട്ടികൾ ഓൺലൈൻ ക്ലാസിൽ പങ്കെടുക്കുന്നുണ്ടെന്ന് രക്ഷിതാക്കൾ ഉറപ്പുവരുത്തണമെന്ന് പ്രിൻസിപ്പൽ മീര റഹ്മാൻ രക്ഷിതാക്കളോട് ആവശ്യപ്പെട്ടു. റിയാദിൽ സേവ സ്കൂൾ, അൽയാസ്മിൻ, മിഡിൽ ഈസ്റ്റ് ഇന്റർനാഷണൽ സ്കൂളുകളും ഇന്ന് തുറക്കില്ല. എന്നാൽ അലിഫ് ഇന്റർനാഷനൽ സ്കൂൾ നാളെ (ഓഗസ്റ്റ് 22) തുറക്കും. രാവിലെ 11 മണിവരെയാണ് സ്കൂൾ സമയം. അൽആലിയ, യാര ഇന്റർനാഷനൽ സ്കൂളുകൾ ഇന്ന് തുറക്കും.
